Gobierno: Plasterk no a bisa Tweede Kamer e berdad

ORANJESTAD - Minister Ronald Plasterk no ta papia berdad. Esey ta e prome reaccion di parti di gobierno di Aruba na NoticiaCla riba e contestanan cu e mandatario hulandes a duna Tweede Kamer diamars mainta. Papiando na nomber di gobierno, minister Benny Sevinger a splica NoticiaCla cu Plasterk ta sigui insisti riba acuerdonan cu no tin, y cu Aruba no a bay di acuerdo cune. Mes momento Sevinger ta sigura cu e contestanan no a kita duda di e miembronan di Tweede Kamer, pa cual lo a exigi di Plasterk pa bay Raad van State pa haya un conseho oficial riba henter e desaroyo aki. "Nos ta kere cu e desaroyonan ey ta positivo" Sevinger a bisa. Sevinger mes a wak e contestanan di e mandatario hulandes y segun e, nan no ta cuadra cu palabracionan haci. 

Segun Sevinger, Plasterk ta referi na acuerdonan cu e a pone riba papel, bisando 'tende bosonan tin cu sigui e trayecto cu IMF a  pone esta cu nos mester por tin un presupuesto a base di un balance budget pa 215". Esaki ta nifica cu ta bay di un deficit di 8% pa 0% den un anja. Tur e cartanan cu gobierno a contesta Plasterk, segun Sevinger, a bisa cu ta sigui e acuerdo di balance budget. Cada bes Plasterk ta bin bek riba e IMF trayect, locual segun Sevinger, no ta e caso."Nunca nos no a haci e afspraak ey cune". Sevinger ta spera cu Tweede Kamer bay mas leuw cu e asunto aki pasobra segun Plasterk, unilateralmente loke cu e pone riba papel, e ta considera como afspraak, siendo cu esey no ta e realidad. Foto di NoticiaCla: Momento durante conseho di minister di Aruba diamars mainta pa discuti e KB y tambe e contestanan di Plasterk na Tweede Kamer.