Resultado encuesta: Tene scol cera despues di 11 di mei proximo

ORANJESTAD – Segun e ultimo encuesta di noticiacla via su pagina di Facebook, gran mayoria di esnan encuesta, ta pidi pa laga scol keda cera (78%) y un minoria (22%) ta pidi pa e habri bek despues di 11 di mei proximo. Mirando sinembargo cu e ta un encuesta ‘limita’ na posibilidad di contesta, tin varios nota secundario cu a keda comparti tambe. Pa loke ta e encuesta, por a duna dos contesta, esta 1, laga scol cera, 2. Habri (scol) bek. Mil 900 persona a vota pa tene cera y 558 persona a vota pa habri bek. E encuesta a dura 48 ora y a keda haci durante fin di siman. E no ta un encuesta hopi representativo, pero si ta duna un indicacion di kico ta biba ‘eyfo’. 

COMENTARIO SECUNDARIO

Loke a hala atencion, ta e tipo di comentario acerca cu a bin. Entre esnan cu mas a domina, ta e comentario pa tene scolnan cera aworaki, per direct como vacacion extendi. Laga docentenan tambe tene nan vacacion mas largo, y despues na juli ta habri bek, un luna, haal in e ‘daño atrasa’, y na augustus bay cu vacacion dos siman (niun hende lo biaha toch pasobra frontera mas sigur lo por ta cera ainda of hende no tin e fondo pa biaha of pa inseguridad di salud no kier biaha), y cuminsa scol bek mei mei di augustus atrobe. Den e direccion ey hopi a pensa. Pasobra pa hopi , aworaki, mirando e situacion, no ta prudente pa habri scol ya cu manera maestronan mes a vocifera, nan no ta pro un reapertura, tanten cu no tin un plan drechi di con pa atende cu e muchanan na scol fisicamente.