Pronk: Bo lanta contra first responders, ta detene bo y bo ta keda cera

ORANJESTAD – Personanan cu durante Toque de Queda (TDQ) ta lanta contra polis, lo wordo deteni, y keda deteni. Asina fiscal Yolanda Pronk a bisa durante briefing di coronavirus durante fin di siman. Y cu deteni, no kier men cu ta detene e persona y lague liber ora cu e TDQ caba mainta, sino mas bien ta keda deteni. Por considera esaki como  zero tolerancia di ministerio publico segun Pronk. E persona ta haya un asina yama ‘dagvaarding’, osea un citacion pa presenta na corte. 

NO POR PAGA BOET

Esnan cu ta lanta contra polis durante TDQ, no ta haya un oportunidad pa paga un multa, manera ta e caso ora cu polis hayabo riba caminda (sin cu a lanta contra polis). E personanan cu lanta contra polis, di biaha nan caso ta bay corte, pa asina un huez dicidi riba e caso. E consecuencia por tin cu si huez haya cu tin suficiente prueba, cu ta trata un caso castigabel y cu e persona ta castigabel, e persona aki ta wordo sentencia door di huez. Esaki kier men cu e sentencia aki ta bin riba e carchi di castigo di e persona. Esey ta nifica tambe cu ora cu e persona aki kier busca un trabou den futuro, of e persona tin un trabou y su doño di trabou pidie pa un papel di bon conducta, e persona lo no ricibi esaki di OM.