Sindicatonan ta bati na porta di gobierno Hulandes

ORANJESTAD – Sindicatonan SIMAR, SEPPA y SPA a bati na porta di gobierno Hulandes den fin di siman. Den un carta pa director di e oficina di representacion di gobierno Hulandes (VNO) diasabra anochi, nan a pidi un reunion urgente , relaciona cu e medidanan cu gabinete Wever Croes kier impone riba nan. Ta trata di e reduccion di salario cu gobierno a propone diabierna ultimo, y pa cual sindicatonan tin cu duna gobierno un contesta dialuna atardi. E reunion mientrastanto cu e representante di Hulanda lo tuma lugar awe mainta. 

E CARTA

E sindicatonan di maestronan, polis y trahadonan publico a pidi e reunion ‘urgente’, y ta e intencion di 'pidi conseho y posibel ayudo ' y informa e director di e situacion. E carta ta consecuencia di un encuesta teni entre e miembronan, kico nan tin cu haci. Y un di e preguntanan di e encuesta tabata si mester reuni cu VNO. Y den forma abrumador, a haya un si, riba esaki. E base di e carta pa VNO su director, ta cu segun e sindicatonan menciona, nan no ta wordo tuma na serio, y cu nan interes no ta wordo tuma corectamente. Nan a inclui un documento cu e contenido di e reunion cu gobierno di diabierna. Segun presidente di SIMAR Josephine Albertus na noticiacla.com dialuna mainta, nan intencion ta tambe “pa trese pa dilanti cu gobierno no kier dialoga pero impone y pa laga nan sa cu gobierno no kier baha nan gastonan”. NOTA: E potret ta di un accion di sindicatonan SEPPA y SIMAR algun tempo atras riba otro tema.