Knops no a reacciona riba diferencia di opinion den CAFT mes

DEN HAAG – Secretario di estado Hulandes Raymond Knops no a reacciona riba e diferencia di opinion cu recientemente a surgi den e colegio di supervision di tanto Aruba (CAFt) como e otro islanan (CFT), den un carta cu el a manda pa Tweede Kamer diabierna. Den e mesun carta e ta relata si riba e ultimo desaroyo financiero relaciona cu coronavirus crisis. E no ta haci niun mencion di e tema di diferencia di opinion ey, pero si ta mustra cu ta sigui e conseho di e colegio. E mandatario tampoco no a reacciona riba e tema recientemente durante un conferencia di prensa siman pasa diahuebs mainta cu periodistanan. 

E SITUACION

E carta di 5 pagina ta relata e situacion di tur e islanan, incluyendo Aruba y kico exacto a dicidi y palabra den e ultimo reunion di conseho di minister di reino di siman pasa diahuebs. E ta splica p.e. cu Aruba ta haya un fiansa inicial pa cubri 6 siman (luna di april y 2 siman di mei) di 42.8 miyon florin, cu mientras ta condiciona na cierto punto, lo no mester paga interes y por paga esaki bek aki 2 aña. 

CONTINUACION

Loke ta interesante ta e hecho cu ta papia di e continuacion di ayudo (eventual) despues di e 6 simanan. Aki tambe ta dispuesto pa yuda, pero e ta dependiente di un pakete di medida dirigi riba reforma structural (pa Aruba tambe). Ta referi na e pasado unda cu a haci cierto palabracion pero no a duna esaki suficiente contenido. Pues Aruba (y e otro islanan) no tin un ‘trackrecord’ positivo pa loke ta esaki. “Cu e hechonan aki di experiencia, lo tin condicion na ordo pa e sosten financiero adicional’, e carta di Knops ta sigui bisa. Lesa e carta completo AKI.