Polis a inicia investigacion penal den caso di video pornografico den kapel Alto Vista

ORANJESTAD - En conexion cu un video pornografico cu ta bayendo rond di un hende muhe na Kapel di Alto Vista , Cuerpo Policial bou liderazgo di Ministerio Publico a cuminsa un investigacion penal. Asina vocero di polis Lito Laclé a confirma diasabra mainta. E video ta graba di un actriz Spaño pornografico cu ta opera bou di e nomber Betty Foxxx riba e canal Pornhub, cu e mes a traha den e kapel. Noticiacla.com a tuma nota di e video, cu e persona ta drenta e kapel, pone e camera su dilanti mientras cu e ta papiando cu un persona den e kapel. E ta mustra su parti intimo riba e video. 

INDIGNACION

E video aki unabez cu el a bira conoci, a crea un disgusto grandi den comunidad, mirando unda e ta traha. E portal aki mientrastanto a compronde cu e persona a pidi disculpa riba su plataforma, y diasabra merdia, a kita e video di e sitio pornografico. No ta conoci exactamente ki cargonan ta acusa e persona di dje, pero ta confirma cu lo persigui e persona aki. E persona en cuestion lo no por a bandona Aruba debi na e ‘lockdown’ relaciona cu coronavirus. No ta conoci si e persona ainda ta na Aruba.