Demanda a forza servicio di rijbewijs keda habri toch

ORANJESTAD - Aunke na un principio a planea pa cera e Departamento di Polis cu ta procesa rijbewijs te otro aña pa por a caba di haci algun trabou di inventario, toch a dicidi diferente debi na hopi peticion di publico pendiente pa busca nan rijbewijs. Den combersacion cu minister di husticia Arthur Dowers, e la splica NoticiaCla.com cu e seramento di algun dia tabata un ekibocacion. “Pa falta di informacion esey a sosode” Dowers a bisa NoticiaCla.com. Un di e problemanan segun Dowers, ta e demanda grandi y falta di personal pa atende cu esey. Pero tur esey ta kedando cla y como tal por sigui brinda e comunidad un miho servicio awor. Cu e compromiso pa por ofrece mas y miho servicio posibel na publico, Cuerpo Policial a dicidi di toch keda habri riba dianan 22, 23, 29 y 30 di december proximo. Consecuentemente lo tin dos dia mas den e dos simannan cu ta keda di aña 2014 unda por haci peticion pa rijbewijs of busca un rijbewijs nobo na dicho departamento situa na e Warda di Polis bieu na Santa Cruz.