Wever: Dispuesto pa corta mas cu 15% den salario di gobernantenan

ORANJESTAD – Gobierno di Aruba ta dispuesto pa reduci nan salario aun mas cu a palabra cu sindicatonan diabierna merdia. Asina prome minister Evelyn Wever Croes a bisa durante e briefing di coronavirus diabierna anochi. E mandatario a confirma e intencion (manera noticiacla.com a relata anteriormente) di reduci salario di ministernan cu 15% plus algun otro toelage, y ta papia te hasta 20 of mas %. Den fin di siman lo por atende esaki y delibera cu sindicatonan dialuna awor. 

E DEAL

Wever Croes a relata di e prome reunion cu a tuma lugar cu e sindicatonan unda cu a haci un proposicion siguiente. Como aporte di solidaridad, pa loke ta trata minister, parlamentarionan, conseheronan di minister, y director di companianan estatal, pa corta den nan salario cu 10%. Pa loke ta empleadonan di gobierno, empleado di fundacionan subsidia y companianan estatal, pa corta cu 5%. Acerca ta bin pa corta vacantie uitkering cu 50%, prima di augustus y december pa empleadonan cu 50%, e prima di November pa pensionado cu 50%, y corta tur otro bonus cu 50%. E proposicion aki a pidi como solidaridad di awor (1 mei) te cu 31 di December 2020. Cu esaki e prome parti si añadi e cortamento di salario y vacantie uitkering, e ministernan ta aporta mas of menos 15%, y e empleadonan 12.6%. 

CORTAMENTO

E cortamento di gasto combina cu cortamento di gobierno, manera biahamento y otro cos di representacion y mas, ta añadi esey den e total, y ta corda tambe den e sociaal crisisplan cu un otro 10 miyon. Total ta yega na 90 miyon florin cu por wordo corta y usa como aporte di solidaridad pa esnan cu no tin entrada, pasobra nan a keda sin trabou. Sindicatonan a pidi gobierno pa corta mas, y a delibera y lo corta mas, pues e 10% ta bay bira mas halto, y den curso di diasabra por bisa exactamente cuanto esaki lo bay ta. Mas tarda cu e cortamento, lo papia di mas cu 40% si tarda. Ta importante pa mustra e solidaridad cu 37 mil persona cu ta bay perde nan trabou completo.