Patruya militar Hulandes riba beach ta parti di control di costa di Aruba

ORANJESTAD – E vehiculonan di marina Hulandes, esta e 2 anacondanan cu tabata riba beach na Aruba recientemente, enberdad tabata eynan como parti di e patruya cu nan ta haciendo y cu a keda anuncia algun tempo pasa riba noticiacla.com. Asina e vocero di Marina Real Canan Babayigit a confirma pa noticiacla.com diabierna. E portal aki a anuncia prome cu esey, cu Aruba lo conta cu ayudo Hulandes pa cu e coronavirus, y e dos anaconanan pues, tabata parti di esaki. 

RECLAMO

Tabata ora cu e dos anacondanan aki a aparece riba potret riba Eagle beach, cu mas hende a cuminsa cuestiona pakico esaki ta wordo permiti, siendo cu tin un prohibicion pa vehiculo trafica riba e beachnan, ya cu esaki ta wordo daña. Como tal ta reclama e hecho di ley pa un, ley pa tur. Pero for di Babayigit, a compronde cu nan tin un trabou pa haci, y esaki por nifica cu mester haci cierto movicion den cuadro di esaki. Entre otro, nan ta haya cierto dispensacion den e cuadro aki. Ademas, nan tin henter un armada cu nan ta carga cu ne, y no por laga esaki den e vehiculo sin mas. Como tal ta transporta esaki cu nan unda cu nan bay. Y den e caso aki, tabata riba beach.