Companianan di utilidad ‘ainda’ no a bati bel di emergencia financiero

ORANJESTAD – Companianan di utilidad di Aruba, (p.e. entre esnan mas conoci cu ta WEB, Elmar Setar y otronan) ainda no a bati alarma pa cu nan situacion financiero relaciona cu e crisis di coronavirus. Asina prome minister Evelyn Wever a bisa durante un briefing di coronavirus diahuebs anochi. Si bin un peticion mes, gobierno no por bin cu un plan di ayudo pa nan. E companianan enberdad tin e situacion dificil, y lo spera mas tempo dificil cu incumplimento di pago di hopi hende cu lo ta sin trabou den e proximo lunanan.

PAGA CUENTA

Pesey, segun Wever a bisa tambe cu no por bisa tur hende pareu pa no paga nan cuenta di utilidad, pasobra esey lo sigur manca e companianan sigur. Recientemente a pidi esnan cu tin e forza financiero, pa sigui paga nan recibonan. Esnan cu a perde y ta perdiendo trabou, lo por wak con ta haci, pero no tur hende.  

FORZA FINANCIERO

Gobierno no tin e forza financiero tampoco pa tuma e peso financiero di nan over, ora cu cos bay malo. Esaki pasobra aworaki gobierno tambe tin hopi problema. Cada compania ta trahando riba un plan di contingencia cu ta cambiando cada biaha pasobra e ta un crisis nobo. Te ainda e companianan no a ‘trek aan de bel, cu ta bisa cu nan ta asina mal para cu porta nan por bay falliet. Danki Dios” Wever a sigui bisa. Sinembargo e companianan ta preocupa pa tur e companianan. 

CARTA DI ELMAR

Mientrastanto tin un carta ta circula den media di un di e companianan di utilidad dirigi mas tanto na comerciantenan cu e peticion pa sigui paga nan cuentanan sino dado momento, lo por cuminsa corta e servicio. Esaki pasobra e compania di utilidad no por wanta e peso mucho largo. A compronde cu pa awor, lo no corta servicio, pero ora cu cos ‘normalisa’, e ora si lo cuminsa corta esaki.