Eerste Hulp y Radiologia na ImSan habri durante dianan di fiesta

ORANJESTAD - Servicio di Eerste Hulp y Radiologia na ImSan ta habri durante dianan di fiesta. Asina mes ta haciendo extra esfuerso pa concientisa publico pa tene extra cuidao cu comemento excesivo, bebemento excesivo y stuur auto bou di influencia di alcohol, cu tur consecuencia cu esey por trece. Specialmente diabeticonan y pashentnan cu ta sufri di presion halto mester ta mas atento cu nunca.

Ya caba den ultimo simannan por ripara mas accidente di trafico cual ta tipifica e dianan druk di fin di aña. Sea prudente y laga nos ta consciente y yuda otro yega e final di 2014 cu siguridad di por gosa e apertura di un aña nobo.

Departamentonan di ImSan ta prepara pa duna e miho servicio na su pashentnan. “Ta bon pa tuma nota cu tanto Centro Diabetico como Departamento di cuido pa wowo lo no ta habri den e dianan di fiesta. Eerste Hulp y servicio di Radiologia si lo keda den funcion den dianan di fiesta”, asina Dr. Monica Nuboer a duna di conoce.

“Riba dianan di fiesta lo opera cu 3 diferente vehiculo y for di tres diferente post cu ta na ImSan San Nicolas, Sasaki y e Post central situa na Wayaca”, segun Liberato Hoek a enfatisa.

Servicio di Ambulance ta haci un yamada na e publico pa na momento di accidente pa coopera y habri caminda pa Ambulance por pasa. Na momento di yama 911 sea specifico, tin bon detaye di kico ta pasando p’asina e personal por cuminsa brinda asistencia via telefon caba y ta miho prepara pa ora nan yega nan sa kico precies ta tumando luga. E centralista por haci un screening completo ya cu esaki ta parti di e proceso di e servicio di Ambulance.

Den e dianan festivo cayanan lo ta hopi druk, pesey sea creativo y planea bo dia miho dor di sali mas trempan pa bo no tin nodo di core duro. Si bo tin mucha den auto, corda haci uzo di bo Baby Car seat y pa tur cu ta tras di stuur ta vigilante y no abusa di alcohol.