Cu 13 detencion, ainda hopi no ta tuma TDQ na serio

ORANJESTAD – Un biaha mas nos pueblo a demostra cu nan no ta respeta regla y ley. Por lo menos un grupo di 13 persona cu durante e di 27 anochi di toque de queda no a respeta autoridad y a keda deteni. For di tempran diahuebs anochi, apenas 4 minuut despues cu toque de queda a drenta na vigor, e prome detencion a cay. Y polis a dicidi di actua severamente diahuebs anochi/diabierna marduga. Y publicamente nan a alerta e comunidad, pero ni asina. 

ALERTA 

Segun vocero suplente di polis Liliana Rasmijn, diahuebs anochi tur districto a activa cu accion serio riba e di 27 TdQ. “Diferente unidadnan riba caminda, den tur bario y districto. Te na e momento aki ta conta cu mas cu 5 detencion!” Rasmijn a bisa apenas un ora y mey cu e toque de queda a drenta na vigor. Y asina a sigui y finalmente e cifra a keda na 13. No ta conoci si ta e mesun grupo di persona ta esun cu ta keda rebeldia of si ta un ta ‘motiva’ e otro pa haci daño y rebeldia tur anochi. Manera noticiacla.com a bisa caba den pasado recien, ta buscando informacion di e tipo di persona su cultura, edad average pa sa unda e problema ta y den cua barrio tin mas problema.