Segun DVG mas hende den Paradijswijk lo por a contagia cu COVID-19

ORANJESTAD – Departamento di Salud (DVG) ta indica cu tin posibilidad cu e persona cu a fayece na Paradijswijk diaranson mainta, lo por a contagia mas hende den e bario. Nan ta basa nan mes riba e declaracion di e mama cu a splica cu “ riba dia 14 di april (2020) ainda su yiu tawata move den e bario cu e posibilidad di por a contagia otro persona cu esaki”. Esaki a pone cu DVG cu permiso di e famia, a comparti e informacion aki “pa asina por juda para e contagio di COVID-19”. 

PETICION 

Basa riba e informacion aki, Departamento di Salud Publico a haci un yamada na esnan cu por a bin den contacto cu e persona aki entre  7 di april y 14 di april 2020  pa por fabor tuma contacto cu Call Center na telefoon 280.0101. Esaki pasobra tin chens cu nan lo por a keda contagia cu e virus. 

E PERSONA A TEST POSITIVO

Manera ta conoci diaranson atardi a bira conoci cu e persona en cuestion cu a fayece na Paradijswijk a test positivo pa Covid19. Esaki despues cu a haya informacion di e caso, cu a pone cu segun protocol DVG a instrui su personal pa bay haci e investigacion necesario y a disidi pa test e fayecido pa COVID-19. E famia a wordo instrui pa mantene nan mes den cuarentena mientras ta warda e resultado di e test.

CUARENTENA

Ayera tardi laat a ricibi e resultado di e test haci riba e fayecido cual ta indica positivo pa COVID-19. Conforme e protocol famia a wordo instrui inmediatamente pa nan permanece den cuarentena.

CONTAGIA MAS HENDE

Segun e mama di e fayesido dia 14 di april ainda su yiu tawata move den e bario cu e posibilidad di por a contagia otro persona cu esaki. Ta trata di un persona special cu ta move hopi den e bario y ta cuminda tur hende cu e topa. Pa e motibo aki a pidi aprobacion di e mama pa por divulga e informacion aki pa asina por juda para e contagio di COVID-19. E famia ta dunando tur cooperacion necesario pa cu esaki.