Hospital cu plan pa dianan di fiesta pa sigura fluho sin menos problema

ORANJESTAD - Hospital ta encurasha tur pashent durante dianan di fiesta, cu tin sintomanan di condicionnan no urgente pa bishita e Huisartsenpost, situa banda di Botica Eagle y ora cu esaki ta cera y pa condicionnan urgente pa bay directamente na Spoedeisende Hulp na Hospital. Por ehempel pa un dolor di cabes of dolor di horea e Huisartsenpost mester ta e prome opcion pa e pashent, ora cu e oficina aki ta habri.

E pensamento di hospital ta cu tur aña tin un patronchi cu ta presenta den e tipo di casonan cu Spoedeisende Hulp ta atende durante e dianan di fiesta, segun e vocero di hospital, Charlaine Alexander-Huntington. Maltrato, consumo excesivo di alcohol, accidente causa dor di ta bou di influencia di alcohol, muchanan cu no ta come debidamente of ta come cuminda cu a keda para y a daña, entre otro ta e casonan cu mas sa presenta. Na e casonan ta wordo añadi kemadura causa pa klapchi durante e dianan cu mag di tira klapchi, particularmente dia 31 di december y dia 1 di januari.

Hospital ta sigura cu den e dianan di fiesta nos dilanti, Dr. Horacio E. Oduber Hospitaal tanto na Spoedeisende Hulp (Eerste Hulp) of na e Huisartsenpost – oficina di Dokter di Cas na Warda, nan ta provee e cuido medico basico como tambe specialisa 24 ora pa dia, tur dia y specialmente den dianan di fiesta ora cu tur oficina di dokter ta cera. Sugerencia haci ta pa cada persona durante dianan di fiesta, “mira bon kico bo ta come” y specialmente no come cuminda cu a para largo y ora di cende klapchi pa tene cuenta cu tur medida di prevencion necesario y sea extra cauteloso ora ta trata di mucha. Si e kemadura no ta mustra dje grave ey, cu ta miho pa mesora wanta e kemadura bao di awa cu un temperatura fresco pa mey ora. Si e kemadura ta of ta bira grave, bay Spoedeisende Hulp pa asistencia.

E hospital ta pidi comprension for di awor caba, pasobra tradicionalmente e dianan nos dilanti ta bira hopi ocupa, pues ta nota un aumento barbaro di pashentnan cu ta yega Spoedeisende Hulp, algun cu condicionnan hopi grave y tin algun momento cu e tempo pa warda por ta un poco mas largo. Tin dos Dokter y cuater Nurse na warda pa asisti tur pashent y den dianan manera Pasco y Aña Nobo lo tin mas personal presente.

Ta pidi pa comunidad tene den mente cu e entrada di Spoedeisende Hulp (Poli) a cambia en conexion cu e renobacion y construccion andando y cu e entrada pa e departamento aki ta awo na e parti dilanti di Hospital, na e mesun entrada cu e departamento di revalidacion. Esaki ta keda na e parti na man drechi di e edificio principal.