Despedida pa Hilward “El Principe” Croes a cuminsa

ORANJESTAD – Diadomingo atardi tabatin e prome oportunidad pa comunidad por a dispidi di e musico popular Hildward “El Principe” Croes, despues cu e la fayece siman cu a pasa na Colombia. For di 4’or di atardi famia, conoci y tur esnan cu tabata sinti nan mes yama pa dispidi, por haci esaki na Aurora Funeral Home, y por haci esaki te 9’or di diadomingo anochi. Ta conoci awor cu Hilward Croes a keda crema na Colombia, y como tal por a mira e urn den cual e shinishi di e defunto tabata deponi. No ta usual cu ta pone ora asina largo di condoleer riba un dia, pero mirando e situacion, a opta (mirando e popularidad di Hildward) pa hacie di e forma aki pa toch por complace cu tur hende.

Despues di diadomingo, tin oportunidad atrobe dialuna for di 5 pa 7or di anochi na Plaza Betico Croes, prome cu e tributo musical planea. “Nos ta bay dispidi di dje manera cu e la merece” Erik Jan Eman y Martin Buitenweg a bisa NoticiaCla.com diadomingo atardi. Nan ta dos musico cu tabata hopi sera mes cu Hildward y semper a toca hunto den varios constelacion. Nan ta wordo considera practicamente como famia di Hildward, y como tal tabata tambe na yegada di Hildward for di Colombia diabierna ultimo, y e promenan na e funerario diadomingo.

E tributo musical pa Hildward ta dialuna di 7-12 di mei anochi, y e entierro mes ta sigui diamars proximo pa 12’or di merdia na misa di Sta Cruz. Riba e fotonan por haya un prome impresion di e momento na funeraria