Ainda no ta conoci con Arubiano Maduro na Hulanda a fayece

HAARLEM – Ainda no ta conoci pa polis con e Arubiano Gregori Lindomar Maduro (31) na Hulanda a fayece. E homber asesina a wordo localisa siman pasa den un lago (meer). Polis a informa su famianan na Aruba caba despues di a haci investigacion di DNA. Diamars a conoce e identidad pero a opta pa publica solamente e edad. A dura un siman prome cu polis por a identifica e cadaver cu a wordo haya den un saco di plastic taba cu ducktape. For di Aruba, noticiacla.com a compronde cu e famianan no a tende mas di dje for di alrededor di 3 di maart ultimo, pero cu no ta nada straño, pasobra e sa biaha pa e paisnan bisiña manera Alemania pa haci algun trabou y e ora e no sa tin contacto. Ademas Lindomar lo a avisa cu tin chens cu e lo cay cera pa un tempo of cu nan lo confisca material di dje, ya cu e tin algun debe. Den e ultimo añanan e lo a drenta cu amigonan di baho mundo, y tabata haci intento pa sac’e for di e ambiente ey. Mientrastanto tin un Team Grootschalige Opsporing (TGO) cu ta investigando e morto riba e Arubiano.