UA: Por inscribi digital pa aña academico 2020/2021

ORANJESTAD - Universidad di Aruba (UA) a informa diaranson cu e aña aki por inscribe den forma digital pa e aña academic 2020/2021. Nan ta spera cu tur studiante y nan famia ta bon di salud. Poco poco nos ta custumbra miho na e situacion actual. UA ta sigui diariamente e desaroyo di covid-19 y ta haci e ahustacionnan necesario. Para keto no ta un opcion. “Ta di aplaudi con nos Universidad den tempo record a bay di duna les den un local, pa college completamente online. Mientrastanto UA a cuminsa prepara tambe pa registracion pa e aña academico nobo, 2020-2021”. 

FORMULARIO DIGITAL

Apesar cu e registracion oficial ta cuminsa mas den luna di mei, UA kier tin un idea di e cantidad di interesado pa e aña academico nobo. Pa calcula esaki UA a crea un formulario digital. Nos ta consciente, cu mirando e situacion actual di covid-19, lo tin mas interes pa studia na Aruba mes. UA ta pidi tanto e studiantenan interesa, cu ya tin un diploma caba, como esnan cu ta den proceso di graduacion, pa yena e formulario aki.

UNDA PA INSCRIBI

E Formulario lo ta riba website y e paginanan  social; Facebook,  Instagram y nos website ua.aw di Universidad di Aruba. UA lo acerca tambe scol secundario pa duna e studiantenan corespondiente e informacion aki. E meta principal di UA ta, pa ta mas miho prepara posibel pa ricibi nos studiantenan nobo. 

TOEFL Y SAT

Ademas, tin algun estudio na Universidad di Aruba cu tin cierto exigencia adicional, manera TOEFL y SAT test. Mundialmente tur e testnan aki a wordo cancela. Pa evita consecuencia negativo pa nos studiantenan, nos ta desea di tin e informacion aki na tempo pa por traha na solucion. UA ta considera e situacion actual un reto y ta mira como su tarea pa yuda su studiantenan. UA ta invita tur persona cu ta desea di inscribi como studiante na UA pa e proximo aña di estudio, 2020-2021, pa yena e formulario digital aki. UA ta haci un peticion na tur esnan cu por ta na altura di studiante of persona cu ta interesa pa haci un estudio na Universidad di Aruba e aña benidero, pa por fabor comparti e informacion aki cu nan.