Baluarte di cultura Hubert “Lio” Booi a fayece

ORANJESTAD – Un baluarte di cultura di Aruba, Hubert “Lio”Booi a bay sosega diasabra anochi, na edad di 95 aña. E tabata malo pa algun tempo y a fayece den hospital. Booi, boneriano di nacemento (1919), a considera su mes Rubiano for di tempo cu e la bin biba na Aruba, integrando su mes completamente riba nos isla. Booi, fuera di tabata poeta, tabata pintor y musicante tambe. Su trabou mas grandi, pero porta no hopi conoci, ta e di tres couplet di e himno di Aruba, Aruba dushi tera.

Booi a nace na Nikiboko na Bonaire riba 25 di juli 1919. E la atende scol basico na Bonaire y cu 18 aña a bin biba na Aruba na 1937. E la casa cu Floraquetina Corononel y tin 6 yiu. Un homber y 5 muher di cual porta esun mas conoci ta Lidwina. Booi a traha den gobierno na e.o. WEB, oficina di turismo, y despues servicio di informacion di gobierno (BUVO awe). Pa 15 aña e la maneha Instituto di Cultura di Aruba. Finalmente na 1980, Booi a bay goza di su pensioen bon mereci.

Su carera artistico nunca no a para. Premionan tambe e la gana y haya na cantidad. Entre nan e Premio di Papiamento na 1999. Un honor grandi tabata ora cu na 2003, Cas di Cultura a nombra e plenchi paden na su nomber, Plaza Hubert Lio Booi. NoticiaCla.com ta manda palabra di forza pa su famianan y cu e baluarte di cultura sosega na paz. Foto cortesia bibilioteca publico di Aruba.