Merca ta stop ayudo financiero pa World Health Organization

WASHINGTON – Presidente Mericano Donald Trump a anuncia diamars anochi cu e ta para financiamento di World Health Organization (WHO) pendiente un investigacion riba e forma con WHO a atende cu e brote inicial di coronavirus, despues cu e organisacion a critica su restriccion di biahe pa China. Trump a acusa WHO di severamente mal maneha y sconde e coronavirus, sigur e comienso di e brote na Wuhan, China. E la rabia cu WHO pasobra e ultimo aki a critica e hecho cu Merca a prohibi Mericanonan pa biaha pa China na februari, ora cu e pais asiatico tabata e epicentro di e virus. Trump tin duda cu e placa cu Merca ta hinca den WHO, ta wordo usa optimalmente. Cu e paro di pago aki, ta cuestiona awor si e ta afecta e ayudo pa varios pais pa bringa e virus. 

Merca ta contribui 500 miyon dollar tur aña pa e organisacion y ta e donante mas grandi entre 196 pais, y ta conta pa 15% di e presupuesto di e organisacion.