Daryanani: Hende malo a haya miedo di bay hospital pa no pega cu coronavirus

ORANJESTAD – Tin un caida di 50% den e grupo di persona cu mester busca nan salud pero no ta haci esaki debi cu nan tin miedo pa keda contagia cu coronavirus. Asina dokter Deepu Daryanani a informa diamars anochi durante e briefing pa coronavirus. Segun Daryanani, tin hendenan cu ta nenga di bin sea hospital pa haya ayudo medico, cu ta inclui Eerste Hulp.  Nan tin miedo cu ora cu nan bin hospital y Eerste Hulp, nan lo por keda contagia. Como resultado algun persona a fayece, door di sea yega hospital laat pa ayudo, of opta pa no bin mes. 

LAMENTO

Daryanani ta lamenta e situacion ey y a sigura cu hospital ta traha cu hende professional cu sa nan trabou. Esey kier men cu un persona cu ta malo y mester di asistencia medico, por tin garantia cu ora cu e yega hospital, lo wordo atendi debitamente sin cu e tin miedo pa keda contagia. A admiti cu tin hende hospitalisa cu e virus, pero cu nan ta isola. Esnan cu bin pa tratamento, ta haya nan mes bon sirbi, y controla debidamente. Ora cu bay p.e. Eerste Hulp, ta haya asistencia for di pafo den un tent, unda cu un asistente cualifica  ta determina e seriedad di e persona, y ta trata consecuentemente manera mester ta. 

HENDE MALO

E hefe di Eerste Hulp a lamenta cu tabatin caso di hende cu a opta pa tarda pa bin hospital pa nan salud, debi na miedo cu nan ta keda contagia y of keda stigmatisa cu e malesa, cu nan a bin laat. Y ora cu nan a yega, tabata mucho laat pa cual no por a haci mucho mas. Otro caso, manera por a compronde, ta di un persona cu a haya attack di curason na cas y no a bin pasobra e famia lo tabatin miedo cu e of e famia, ta keda contagia cu e virus. Tur esaki Daryanani ta lamenta cu a sosode, siendo cu esaki no mester ta e caso. A pidi y suplica pa no tarda ora cu un persona mester busca su salud, pasobra lo ta lamentable si un persona cu no tin covid 19, fayece debi cu e tabatin miedo pa bin hospital, netamente pa e miedo aki, siendo cu e por a wordo yuda. 

YAMA 100

Ademas Daryanani a bisa cu si un persona bira malo durante e orario di Toque de Queda, cu nan mester yama 100, raporta esaki y bin hospital. E ora no tin problema pa subi caminda y bay hospital. Hopi hende logicamente tin miedo cu sin nan subi caminda y bay hospital, nan ta wordo multa 1000 florin pa polis.