Bonaire ta e unico isla di Caribe Hulandes cu no tin COVID 19

KRALENDIJK – E isla di Bonaire ta e unico di Caribe Hulandes cu no tin caso positivo di coronavirus COVID 19 ainda. Awe mainta gezaghebber di e isla Edison Rijna a confirma esaki pa noticiacla.com. Segun e mandatario, e isla a implementa su prome medida dia 13 di maart ultimo manera cera frontera. A test hende si, y segun Rijna  te cu awe, a test un total di 31 hende, pero ningun di nan a test positivo ainda. 

CASO POSITIVO NA ARUBA DI BONAIRE

Mientras cu Aruba ta raporta cu un di su casonan positivo a bin di Bonaire, DVG a mustra e portal aki cu e persona aki tabatin un historia di biahe y no necesariamente a haya esaki na Bonaire. E persona aki por a haye den avion, e pais cu el a bishita, y of otro caminda, pero no necesariamente na Bonaire. Mester bisa cu e relato e anochi cu Aruba a anuncia e hecho di e persona di Bonaire, a crea un panico riba e isla, unda cu mesora a cuminsa investiga kico ta loke a sosode, si ainda nan no ta raportando nada, mientras cu for di Bonaire mes a sali uno cu ta contagia. Potret cortesia www.tourismbonaire.com