CDC: Barconan crucero a haya orden pa no nabega pa 100 dia

MIAMI – Companianan di barconan crucero tin cu warda un poco mas cu nan intencion pa cuminsa nabega. Esaki despues cu Centers for Disease Control and Prevention  (CDC) a extende e ‘orden di no nabega’ pa 100 dia, of te ora cu COVID 19 no ta un menasa publico di salud mas. Esaki a pone cu companianan crucero cu a anuncia cu pa mei caba lo cuminsa nabega, mester a adapta nan itinerario atrobe.     

CARNIVAL CRUISE LINES

Siman pasa ainda Carnival Cruise Lines a anuncia crucero pa Aruba pa mei 2020 manera cu noticiacla.com a raporta. Autoridad di turismo di Aruba mesora a cuestiona esaki y informa cu esaki no por ainda pasobra ‘ainda Aruba ta den lockdown’ y cu nan lo ‘atende cu e situacion’. Un rato despues, enberdad CDC a haci e anuncio. Segun CDC, tin como 100 barco crucero riba laman cu 80 mil tripulante a bordo. Tin 20 barco na waf of mara na Merca, tin tripulante cu tin e virus, segun e agencia su declaracion siman pasa ainda. 

CANCELA

E industria di crucero a suspende su operacion medio Maart despues cu un serie di brote dramatico di coronavirus a crea pregunta riba e seguridad pa un crucero. Algun barco crucero riba laman e tempo ey, a bringa pa por haya waf cu ta permiti nan pa mara, unda cu mayoria a logra y un grupito ainda ta purbando.  E companianan, lidera pa Carnival Corp, a acerca mercadonan financiero pa ayudo, unda cu Carnival a bisa cu e mester di un biyon dollar pa cada luna cu e no nabega. 

SCHEDULE NOBO

Pa loke ta schedule nobo, Carnival a anuncia cu a ‘bolbe’ cambia esaki y cu awor e fecha nobo pa ‘biaha’ pa Aruba lo ta pa 27 di juni proximo. Si esaki ta realistico, no ta conoci, pasobra 100 dia ta vence na luna di juli proximo.