Gobierno di Reino a aproba prestamo sin interes pa Aruba

DEN HAAG – Gobierno di Reino Hulandes a aproba e prestamo temporal pa e islanan Aruba, Corsou y St Maarten manera cu a keda proponi pa e colegio di supervision financiero, y ta valido pa un periodo di 6 siman. Asina minister Hulandes Raymond Knops di Asuntonan di Reino a bisa durante un conferencia di prensa diahuebs mainta. E prestamo ta uno sin interes, y tampoco mester paga bek durante  proximo dos añanan. 

CONDICIONAN NA E PRESTAMO

E sosten di likides segun Knops, ta sigura pa e proximo 6 siman, cu ta placa cu gobierno por usa pa paga cuentanan, mantene gobierno operacional, y cuminsa paga paketenan financiero na sea negoshi of trahadonan. Loke segun Knops ta importante, ta cu despues di e 6 simannan si e crisis dura mas largo, cu den e fase ey, tambe tin bista riba e sosten financiero. “Esey nos ta bay traha ariba cu e tres islanan (Aruba, Corsou y St Maarten independientemente) pa asina por traha paketenan di medida unda cu ora cu ta trata di fiansanan (mas) grandi, si mester tin un otro crisis den futuro, cu e paisnan ta suficiente solido debi na e medidanan corecto cu a tuma awor”. Knops a bisa. Y cu esey, segun Knops, mester pensa riba pone finanzas publico na ordo, gastonan, impuesto, systema di pensioen cu mester wordo adapta pa ta resistente contra proximo ‘golpinan’. 

PAKICO NO REGALO SINO FIANSA

E pregunta cu mas a resalta durante e conferencia di prensa, ta pakico Hulanda ta opta pa duna fiansa envez di regalo. Knops a subraya cu mester diferencia e tipo di ayudo cu tin. Entre e ayudo, Knops a sigui bisa, a percura y ta percurando pa aparato medico, personal cu a wordo poni disponibel como prioridad number 1. Por interpreta esaki tambe cu Knops kier men cu e parti di ayudo aki tambe ta costa placa y pues lo mester interpreta esaki como ‘regalo’ posiblemente. Tambe ta papia di ayudo pa defensa, cu Hulanda ta duna. “E ayudo cu ta wordo pidi aworaki, ta sosten presupuestario.  autonomo den Reino (Hulandes) mes ta responsabel pa nan asuntonan financiero, y loke cu nos ta haci aki, ta yuda e paisnan pa cu futuro pa drecha nan situacion di cas y pone esaki na ordo. Pa esaki ta rekeri placa, y e condicion cu nos a pone y palabra pa e prome fase, ta cu e prestamo ta uno sin interes. Pa e proximo fase, e forma di ayudo primario lo ta atrobe prestamo, aunke mi no por bisa awor kico exacto pero lo por tin elemento den un otro forma. Y na final di e prestamo ey, por mira kico mester wordo refinancia y kico por wordo regla di un otro forma” Knops a bisa. Esey pa cada pais ta diferente. Potret di noticiacla ta screenshot di e conferencia di prensa via youtube.