Knops: Esaki no ta momento pa discuti riba articulo di Statuut

DEN HAAG – “Mi no ta haya esaki e momento cu mientras tur hende ta atendiendo e crisis, pa bay haci declaracionan riba e tema (interpretacion di articulonan di e Statuut)” minister Hulandes Raymond Knops a bisa durante e conferencia di prensa diahuebs mainta. E ta referi na e keho di varios isla, cu Hulanda lo no ta dunando interpretacion corecto di articulo 36 di Statuut. E articulo ta bisa e.o. cu paisnan den Reino mester sostene otro den tempo di necesidad. E islanan en cuestion (Aruba, Corsou y St Maarten) tabatin critica cu Hulanda ta regala otro paisnan hopi miyones, mientras nos ta haya ayudo pero como fiansa y no regalo. E mandatario Hulandes, no ta haya pues cu esaki ta e momento pa hiba e discussion aki mientras cu ta trahando duro pa combati un crisis manera esun di e coronavirus.

NO TA YUDA SIN CONDICION

Knops a sigui a mustra cu no ta asina cu Hulanda ta bay fia miyones of mas pa yuda economia di e paisnan respectivo pa mantene esaki na bida, cu esaki lo sosode sin condicion, of cu esaki lo sosode solamente den forma di ‘regalo’” Knops a sigura tur hende. “Esey nos (Hulanda) no por carga tampoco. Nos lo no por bende esaki na Hulandesnan cu tur e tempo aki a haci nan propio sacrificio”. 

SOLIDARIDAD

Pa loke ta e tema di solidaridad, e mandatario Hulandes ta recorda e islanan cu esaki ta traha di dos banda. “ Esaki ta nifica cu nos ta yuda e paisnan cu mester e ayudo. Pero nos ta spera tambe di e paisnan cu nan ta haci tur lo posibel den nan poder pa percura cu los di e crisis aki, nan inverti y tuma decision cu nan por drecha nan mesun asuntonan financiero. Si esey no sosode, lo tin un otro situacion unda cu e tres paisnan (Aruba, Corsou y St Maarten) ta dependiente total di un pais grandi. Pero e cosnan no ta regla asina. Y esey ta nifica tambe cu tur pais tin nan responsabilidad” Knops a sigui bisa.   

USA ARTICULO 36

Segun Knops, ta notable cu ultimo tempo paisnan den Reino ta core usa y referi na e Statuut di Reino Hulandes, cu segun e mandatario, ta ok. “Esey ta bon,  pasobra e statuut ta mustra huridicamente con e relacion entre paisnan ta funciona” Knops a sigui bisa. E tema di solidaridad, y pa sostene otro, esey ta na ordo tambe aworaki. “Esey ta e motibo tambe pakico nos ta reuni cu e paisnan y ta bisa nan cu nos ta yuda boso” Knops a sigui bisa. Pero atrobe, no ta e momento pa discuti riba e interpretacion.