Aruba ‘ta aprecia gesto di Hulanda pa fiansa’ sugeri pa CAFT

ORANJESTAD – Den un tono diferente cu un dia anterior, prome minister di Aruba Evelyn Wever Croes a contesta noticiacla.com diaranson anochi durante e briefing di coronavirus, cu e ‘ta aprecia e gesto di Hulanda di un fiansa’ di 42.8 miyon florin pa yuda cubri e gastonan di e crisis cu tin aworaki debi na e virus menciona. E tono tabata diferente cu su declaracion di diamars ora cu e la indica cu e no ta di acuerdo cu e conseho di CAFT. E tono pues a cambia mas sigur despues di e combersacion cu e mandatario tabatin diaranson merdia cu e minister Hulandes Raymond Knops riba e tema. 

TONO DIFERENTE 

Un dia prome ainda Wever den un tono diferente, a bisa cu “e poco cu C(A)FT ta duna den su carta, no ta bay yuda pa pasa e tempo nos dilanti”. Tambe el a bisa cu lo no lague te eynan y cu no a tende e ultimoainda riba e tema. “Pa nos, esaki no ta e ultimo palabra”, tabata e palabranan exacto cu Wever a usa diamars anochi. “E ta simplemente un conseho y nos ta haciendo tur di nos parti pa por yega na e fondo cu nos mester pa por traspasa e periodo dificil aki”. Wever a bisa esaki diamars pasobra manera ta conoci, Wever a pidi hopi mas (1.3 biyon) di cual 400 mester a bin como un ‘regalo’. No solamente a duna gobierno hopi menos cu esey pero a rechasa e idea di un regalo. Como tal ora cu e conseho di CAFT a bin, esaki no a cay den bon tera, y a keda di delibera esaki ‘internamente’ cu Hulanda prome cu e RMR di diahuebs mainta. Pero un dia despues, su tono a cambia y ta parce cu e combersacion cu Hulanda tabata instrumental den esaki. 

CONDICIONAN

E unico cos cu gobierno di Aruba a logra den curso di awe, ta pa kita e parti di interes y cu Aruba lo no tin e ‘dolor di cabez ey’ pa dos aña largo. Fuera di esey, tabatin un lista mas di condicion, cu tambe Aruba lo mester a bay di acuerdo cu ne. Pero diaranson anochi Wever a splica tambe cu e parti mas particular, tabata cu e carta di CAFT no a wordo tuma completamente over door di gobierno Hulandes pues asina lagando cierto otro condicionan afo. Mientras cu a kita algun condicion, mester bisa si cu ta keda otro condicionan cu segun e prome mandatario si e ta ok cu ne, manera e forma di maneha y administra e fiansa, ya cu (CAFT)a dileña henter un structura pa haci esaki.  “Claro, esaki ta logico. Esey no ta un problema alguno pa nos” Wever a sigura noticiacla.com diaranson anochi.