Tjon: Lo no actua contra adictonan ambulante durante toque de queda

ORANJESTAD – Autoridad lo no actua contra adictonan ambulante durante toque de queda, manera cu ta haciendo cu otro hende cu nan haya durante e orarionan ey. Pues lo no detene nan si haya nan riba caya y lo no multa nan tampoco pasobra ta obvio cu nan no por paga esaki.  Esaki pasobra nan situacion ta diferente y no tin lugar pa bay. Asina hefe di polis interino Vanessa Tjon Kock a bisa durante e briefing riba coronavirus. E unico momento cu lo detene e adictonan, ta si nan comete un acto otro contra ley, fuera di e regla di no ta riba caya. Nan lo keda deteni y hiba warda. Pero fuera di esey, ministerio publico a opta pa duna e grupo aki un dispensacion.