Simar: Maestronan hayando menasa di superiornan di scol

ORANJESTAD – Sindicato di maestro SIMAR a haya kehonan for di maestronan na unda nan ta duna di conoce cu superiornan di scol ta menaza y ta abusa di nan poder door di tribi di remarca cu si no por cumpli cu e tareanan, lo kita sumanan for di nan salario. Asina e sindicato ta pone den un carta habri pa medionan di comunicacion. E tin di haber cu e situacion di crisis di coronavirus unda cu maestronan lo mester duna les digital, pero unda cu varios no ta prepara ni ekipa pa esaki. Segun Simar, e  menasa aki no por. “Directiva ta sali fuerte cu un mensahe, cu esaki ta abuso di poder!”

APELACION ?

Segun Simar, den caso cu mester haci apelacion ariba un maestro pa e ehecuta su tarea den un forma completamente digital, cu ta fuera di su custumber, mester a evalua prome si e meastronan tin tur e instrumento pa por haci esaki. Akinan nos ta tende di diferente miembronan, cu nan no ta capaz pa por haci esaki na un manera responsabel, paso kisas: 

- no tin e conocimento, ?

- no tin e liheresa, ?

- no tin e habilidad, ?pa uza y pa traha cu un plataforma nobo cu ta wordo spera di dje. Y pone exigencianan impracticable riba un maestro den e periodo dificil aki, ta algo di condena. E prome responsabilidad ta den man di bo dunado di trabao. Nan tin cu haci e preparacionan necesario pa hacie posibel cu un maestro por duna educacion den e plataforma (digital) cu nan ta desea. Simar ta sigui bisa cu mester remarca y acentua cu nos ta den un situacion serio y dificil y dunador di trabou no por exigi pa kibra hero cu man! ?

COMPRENSION

“Nos di directiva di SIMAR tin comprension total, cu actualmente e tarea di boso como maestro, ta exigi extra empeño, teniendo cuenta cu e circumstancianan cu no ta normal. E extra empeño aki ta encera por ehempel drenta den contacto (mail, zoom, whatsapp, etc) cu e alumno/mayor na cas, evalua e situacion, anto tur esaki na un manera fuero di lo usual y haciendo uzo di instrumentonan personal” e sindicato ta sigui bisa. 

PROBLEMA CU ENSEÑANSA

E problemanan cu enseñansa y specialmente maestronan ta confrontado actualmente, no por a wordo premira. Ta un deber y responsabilidad di un directiva di un scol pa e bin cu preparacion y instruccion – adelanta – prome cu pone exigencia, den cierto caso impractico (“onuitvoerbaar”). Y contrario cu ta sosodiendo awor aki, impone cambio di sistema di educacion na un forma acelera y drastico! SIMAR ta di opinion cu hunto nos ta lucha pa bini cu solucion cu ta acaso y ta responsabel. Y e mihor forma pa haci esaki ta den dialogo cu e maestronan pa wak kiko ta factible y kiko no. 

Por ultimo SIMAR a pidi maestronan pa sigui manda nan precupacion of preguntanan pa SIMAR (info@simar.aw). Pa asina SIMAR por sigui yuda y nan por haya un vista cua ta e dirigentenan cu ta abusa di maestronan.