Minister Glenbert Croes: E crisis aki tin nos humanidad na prueba

ADVERTORIAL)

Nos ta pasando den un crisis sin comparacion cu nunca antes nos generacionnan a biba. Nos ta luchando contra un virus cu tin mundo na rudia, paisnan poderoso manca, economianan tranca y humanidad sclamando pa ayudo. Esaki ta conta igual pa Aruba. Y awor hunto nos mester bay saca cara pa sigura cu nos tur tin un existencia.

COMERCIO:

Comercio cu ta e wes'i lomba di nos economia tambe ta den crisis pa motibo cu gran parti di negoshinan tabata directo of indirecto dependiente di turismo. Ora cu corta den e ader principal di bo existencia como Pais y di un dia pa otro yega na cero turismo, tur e negoshi tin cero entrada. Cu cero entrada no por mantene negoshinan habri cu e consecuencia cu no por paga empleadonan. Un situacion cu nunca no por a premira. Un situacion cu nunca nos a imagina di lo biba den nos bida. Gobierno di Aruba tin tur comprension pa e situacion aki. 

TRAHADONAN:

E ta un situacion inconcebibel, cu di anochi pa mainta, bo ta sin trabou, sin entrada, sin placa, sin cuminda, sin nada. Pa e trahadonan tambe Gobierno di Aruba tin tur comprension y ta bisa boso: "Nos t'ey pa boso tur".

POSICION DI MINISTER DI ASUNTO SOCIAL Y LABOR:

Pa e trahadonan cu a perde trabou of entrada haci bo aplicacion via www.fasehelpdesk.com. Si bo cumpli cu e rekisitonan bo ta bin na remarca pa FASE cu ta un suma di maximo AFL. 950 pa maximo 3 luna pa yuda famia mantene cabes riba awa te unda cu por. Hunto cu FASE, por yega na areglo special di pago cu WEB, ELMAR, SETAR, FCCA pa e proximo 3 lunanan. Tambe ta trahando estrechamente cu Fundacion pa nos Comunidad (FPNC) pa paketenan di cuminda. Banconan ya riba propio iniciativa ta ofreciendo gracia pa e proximo 3 lunanan.

Pa comercio e suplica di parti di Gobierno ta pa purba paga mas cu por e salario di maart na bo trahadonan. Purba mas cu por wanta bo trahadonan na trabou sea cu reduccion di orario, of cu vakantie cu pago. E ultimo recurso mester ta 'no work no pay'. Pa e compania- y negoshinan cu no por carga e peso aki, Gobierno tin tur comprension. P'esey nos a bin cu FASE.