Gobierno ta sostene su representante cu a distancia di conseho di CAft

ORANJESTAD – Gobierno di Aruba ta sostene e miembro di Aruba den e colegio di supervision financiero CAFt, esta Hellen van der Wal, cu a distancia su mes (hunto cu e otro coleganan local di e otro islanan) di e ultimo conseho di e colegio na RMR pa Aruba. Asina prome minister Evelyn Wever a contesta noticiacla.com diamars anochi durante e briefing riba coronavirus. “E tin sosten di gobierno den esaki” Wever a bisa brevemente. 

HELLEN VAN DER WAL

Tabata na juli di 2018 cu e portal aki a bin cu primicia di e nombracion di vd Wal como miembro nobo pa Aruba den e colegio, reemplasando Robert 'Chobby' Croes, ora cu su termino a vence. Vd Wal a inicia cu su labor den CAFt dia 1 di augustus 2018, despues di a fungi pa varios aña como secretaria di Raad van Advies. 

RELACION NO TA CAMBIA

E hecho cu e colegio di supervision pa Aruba CAFt a manda un conseho no positivo pa Aruba den caso di ayudo pa crisis di coronavirus, no ta cambia e relacion cu e tin cu gobierno di Aruba. Asina Wever a sigui bisa riba e tema di e conseho mes. “CAFt ta haci su conseho. E la haciele a base di nan trabounan, y esaki no ta cambia nada den e relacion” Wever a sigui bisa. “Un ta prome biaha cu nos ta haya un conseho asina” Wever a sigui bisa, refiriendo na e trayecto di pasado di e colegio unda cu mas biaha a duna un conseho negativo pa Aruba, of por lo menos no uno cu gobierno di Aruba por biba cu ne. Lesa e carta cu e representante di Aruba a manda ayera unda cu ta distancia su mes di e conseho AKI.