Fraccionan di coalicion kier atencion di Gobernador pa cu ayudo di Hulanda

ORANJESTAD – Lidernan di fraccion di partidonan di coalicion (MEP,POR y RED) a manda un carta di preocupacion y indignacion di e forma con Hulanda ta tratando Aruba, pa gobernador di Aruba SE Alfonso Boekhoudt. E base di e carta, ta e uso of falta di uso di articulo 36 di Statuut, cu ta nifica en corto cu den tempo di necesidad, paisnan den Reino ta yuda otro y ta sostene otro cu ayudo. Den e caso aki, e sosten cu ta wordo pidi ta esun financiero pa por surpasa e tempo di crisis di coronavirus, pasobra Aruba su so no por. Pero segun e fraccionan menciona, Hulanda no ta cumpliendo cu su parti, door di ofrece ayudo den un forma di prestamo, enbez di un ‘regalo’, mientras cu ta conoci cu Aruba no tin e forza awor pa bay atende cu otro fiansa, mirando e situacion financiero precario cu nos isla ta aden. E tres lidernan di fraccion cu a firma e carta, nan a pidi un reunion (cybernetico) cu gobernador pa informe di nan preocupacion. Notable ta cu e fraccion di oposicion (Lejuez, y AVP) no a firma e carta aki. Por lesa e carta AKI.