Prome grupo di polis cla pa enforsa ley di cacho na januari proximo

ORANJESTAD – E prome grupo di polis ta cla pa subi caya na januari pa esforza e ley di cacho. Nan a pasa den un entrenamento e siman cu a pasa, y ta termina  awe cu un ceremonia di entrega di diploma. Nan curso a cuminsa dialuna y a conclui ayera cu e parti practico, sigui pa un ‘dry run’ cu a wordo filma y documenta. Nan a haya tur informacion pertinente di e ley, su embergadura, con pa enforce y deal cune. Mes momento nan a siña hopi mas di cacho, hayando les for di un veterinario y un entrenador di cacho, pa prepara nan mes contra eventual casonan cu nan por haya nan mes envolvi den dje riba caya. Mientras cu tur polis lo ta prepara pa actua, e gruponan aki, lo ta parti di e team special na comienso di aña cu lo subi caya den un forma colectivo pa cuminsa cu enforsa e ley. 

Ayera tardi, a documenta un muestra di nan trabou, pa asina por traha un tipo di video educacional cu lo wordo pasa na television pa mustra comunidad kico por spera unabes aña bolter, ora cu e ley wordo implementa. Minister di husticia Arthur Dowers tabata presente pa personalmente mira e trabou desplega, y sostene e grupo di polis y e miembronan di Plataforma Ley di Cacho, cu a prepara tur cos e ultimo lunanan aki.

Entre e trabounan haci, a percura pa un campaña di concientisacion di algun luna, y tambe e curso di e siman aki pa e prome grupo di polis. Ta intencion cu e di dos grupo di polis wordo entrena ora aña habri, y asina poco poco mayoria polisnan ta ekipa cu informacion y abilidad pa atende cu e ciudadano y cachonan ora cu enforsa e ley.