Segun encuesta, mayoria kier Toque De Queda total pa fin di Siman Santo

ORANJESTAD – For di un encuesta cu noticiacla.com a haci riba un periodo di 24 ora di tempo riba su pagina di Facebook, gran mayoria di esnan encuesta ta pro pa gobierno impone un toque de queda total entrante diahuebs santo te cu diamars proximo (otro siman). Esaki den bista con activo nos isla sa ta durante fin di siman Santo. E pregunta tabata “Ki medida bo ta haya Gobierno di Aruba mester tuma pa weekend di Semana Santa relaciona cu corona virus? (SIP= Shelter In Place). E contestanan tabata sea 1. Shutdown total e weekendof 2. SIP (Shelter in Place) y (tene) beachnan habri.

RESULTADO

E resultado tabata cu for di  casi 2000 persona cu a participa, gran mayoria, 1.623 persona (85%) a vota pa e shutdown total, osea un toque de queda 24 ora pa dia di diahuebs pa diamars. E minoria cu a participa, 277 (15%) a scohe pa Shelter in Place cu beachnan habri. Pues mayoria ta sostene e idea di un toque de queda total. 

SUGERENCIA

Mirando cu e posibilidad di opcion ta limita, den comentarionan hopi a duna un otro sugerencia, cu por tabata un opcion di algun. Por ehempel, pa e Shelter in Place, pa haci esaki mas estricto, y cera beach tambe. Pues no por landa of ta riba beach, pero si por move rond. Otronan ta haya cu mester te hasta alarga e Toque de Queda 24/7, manera cu a haci na p.e.  St Maarten, unda cu a pone esaki pa 2 siman total. 

GOBIERNO

Gobierno a duna indicacion (hint) dialuna cu ta evaluando pa aumenta e medidanan y anuncia esaki posiblemente diamars anochi caba. Y cu e intencion of e posibilidad ta grandi cu por aumenta e toque de queda pa full weekend santo. Esaki mirando cu den dia, ainda tin hopi hende cu no ta compronde e esencia di e medida. Hopi hende ta opta pa para den rij pa paga cos, sea ta utilidad of otro recibo, y of bishita supermercado como un ‘meeting place’, tur dia, enbez di drenta y cumpra y bay.  Esaki ta destrumpi henter e intencion di e medida. Basa riba esaki, gobierno a duna un indicacion cu por tuma pasonan mas severo den e proximo 24 pa 48 ora.