Gobierno ta formaliza nombracion Trudy Hassell pa KIA awe

ORANJESTAD - Den e reunion di Conseho di Minister di awe mainta, lo formaliza e nombracion di Trudy Hassell como e proximo director di KIA. Diahuebs minister di husticia Arthur Dowers a confirma e primicia di NoticiaCla.com di e nombracion di Hassell como hefe di KIA. E loke ta sosode awe mainta ta meramente un formalidad, ya cu tur cos ta cla caba pa Hassell asumi su funcion entrante 1 di januari 2015. Mes momento Dowers a desmenti e rumornan cu Allan Howell lo ta parti di e plan pa bay KIA. “Esey no ta berdad” Dowers a sigura NoticiaCla.com diahuebs atardi.

Den su comentario diahuebs atardi, e titular di husticia a confirma cu Hassel ta miho pa e funcion debi na e estudio , experiencia y cualidadnan cu e ta posee. E seleccion (manera cu NoticiaCla.com a raporta tambe) a presenta a rapport final na e titular di husticia, den cual a repasa e candidatonan, e procedura y na final ta propone e candidato miho prepara pa e funcion.

Segun Dowers, e tarea di Director di KIA ta sumamente pisa y dificil. E rekisitonan di e funcion ta poni riba papel y e exigencianan pa e Director nobo ta hopi cla describi. E mandatario a conclui bisando cu ta su intencion pa reenforsa e maneho na KIA cu algun experto mas. E procedura di seleccion ta andando y ora cu keda cla lo publica e resultado tambe.

Tabata e comienso di siman aki cu NoticiaCla.com a bin cu e primicia cu actual comisario di polis Trudy Hassell a bira e proximo hefe grandi na KIA. Esaki NoticiaCla.com a haya confirma di su fuentenan, aunke no por a bisa e momento ey ki dia Hassell lo a cuminsa cu su funcion na e posicion.