Minister ta coregi DVG riba uzo di metodo pa bringa COVID-19

ORANJESTAD – Durante fin di siman a surgi un confusion y controversia riba e maneho di Departamento Di Salud (DVG) pa combati e coronavirus COVID-19 na Aruba. Y dado momento ta mustra como si fuera tabatin un discrepancia entre e minister y e departamento cu ta resorta bou di dje, esta DVG. E metodo na discusion ta ‘groeps immuniteit’, osea ‘herd immunity’ cu ta e metodo pa mas hopi hende keda infecta, creando un imunidad contra e malesa mas liher. Algo cu Hulanda a y ta aplicando pa resolve nan situacion di e virus. 

KICO A PASA DEN WEEKEND

Tabata diasabra anochi cu hefe di Departamento di Malesa Contagioso (DBZ) Sharline Koolman a bisa cu Departamento di Salud ta aplicando e ‘herd immunity’, osea: groeps immuniteit pa domina e virus, como medida pa crea un ‘defensa’ contra esnan vulnerabel. E declaracion aki a crea un discusion mirando cu pa un isla manera Aruba, e metodo aki  por tin su retonan pa nos isla, ya cu nos constelacion no ta uno ‘normal’ pa aplica e metodo aki. Dos medico local a confirma recientemente na noticiacla, cu Aruba su poblacion ta asina diferente cu p.e. Hulanda, unda cu p.e. eynan 80% di e comunidad keda infecta, e ta crea e barera suficiente pa defende e 20% cu ta vulnerabel pa e virus. (Pa regla 60% di e poblacion mester ta infecta pa por papia di un groeps immuniteit). Esaki pasobra eynan 80% ta hende saludabel, mas hoben y sin hopi risico. Algo na Aruba no ta e caso. Un grupo grandi na Aruba ta den risico, debi na p.e. diabetico, sobrepeso (obesidad), cancer y otro malesa cronico. Pues no ta solamente 20% di e grupo di edad halto ta na peliger. Mas hende haya e virus na Aruba, manera cu a splica, ta nifica cu mas hopi hende lo bira malo y haya complicacion. Y esey ta algo cu Aruba no tin e capacidad pa maneha teniendo apenas un hospital cu material limita. Esaki a crea e discusion e ora. (scucha e declaracion di Koolman AKI. 

METODO CU VACUNA

Loke ambos persona a bisa ta, cu ora cu tin vacuna pa e virus, ta aplica e asina yama ‘groeps imuniteit’. Pero loke Koolman a bisa acerca, ta netamente unda e confusion por a bin. “Door di cu nos no tin vacuna aworaki, e idea ta, mi ta menciona cu pa Departamento di Salud Publico, mas caso bo tin pa dia, y si ban bisa, bo tin 10 caso, ningun a bay hospital, esey ta un, nos a gana cu esey, Aruba a gana cu esey. Pa ki motibo, pasobra bo ta yega na e groeps immuniteit, bo ta yega na dje mas lihe” Koolman a bisa diasabra durante di e briefing di anochi. Aki e ta confirma cu DVG ta uzando e metodo di groeps immuniteit door di test mas hopi. “Si nos ta haya un caso pa dia of 0 caso pa dia, ki dia bo ta yega e groeps imuniteit ey? P’esey nos ta desea cu nos ta haya mas caso positivo pa dia” Koolman a sigui bisa.

REACCION DI MINISTER ODUBER

Dialuna, e mandatario a bin dilanti, pa clarifica e asunto. Esaki pasobra segun Oduber, e ta considera cu e pregunta di herd immunity of groeps immuniteit a crea confusion. Segun Oduber ningun momento e strategia tabata pa crea herd immunity. “Pasobra si esey tabata e strategia, e ora ey gobierno lo no mester a tuma ningun medida di bay den lockdown, shelter in place, toque de queda. E ora nos lo a laga tur hende biba liber anto pa mas hende wordo contagia posibel” Oduber a bisa. Segun e mandatario, netamente a tuma tur e medidanan pa mas hende wordo contagia. Despues den intencion di sea defende e departamento of clarifica e asunto e mandatario a bisa: “Mi ta kere loke DVG lo kier a trece dilanti, ta cu tanten no tin un vacuna pa COVID-19, e unico manera cu pais por bay bek na normalidad, ta na momento cu e pashentnan cu a haya covid, bira imun pa e malesa aki”. Y despues su tras, e mandatario a bolbe subraya su punto: ”Pero ningun momento ,- laga mi ripiti esaki, pone hopi enfasis riba esaki-, e maneho ta dirigi riba groeps imuniteit” Oduber a sigui bisa. “ Nos maneho y strategia ta dirigi riba haci mas y mas test, identifica e personanan cu ta sali positivo na un stage hopi trempan, isola tur e personanan aki, y percura pa tin un bon contact tracing”. Oduber a sigui bisa. Scucha e declaracion di minister Oduber AKI.