Fecha di entierro di Hilward Croes ta conoci

ORANJESTAD – Despues di deliberacion interno di famia di Hildward Croes, nan a dicidi diahuebs atardi cu su entierro ta tuma lugar diamars awor y esaki lo ta na Misa di Santa Cruz. Mientrastanto NoticiaCla.com a confirma tambe di famia, cu e curpa di Hilward ta yega Aruba mayan, pero for di Colombia pero esey lo ta den seno familiar solamente. Diadomingo lo tin oportunidad pa condoleer na Aurora Funeral home, sigui pa e entierro mes cu ta diamars na e lugar ya indica, sigui pa e santana na Sta Cruz mes. Loke ta purbando ainda y no ta confirma, ta e plannan pa haci un of otro tributo musical na su honor, dialuna awor. E detayenan ta wordo traha ariba ainda y no ta confirma ni concretisa ainda. NoticiaCla.com a wordo sigura cu esey ta den tramite aworaki ainda y asina cu e ta cla, lo divulga esaki mesora. Notable ta cu hopi artista y otro personalidadnan conoci, a cuminsa manda mensahe den direccion di gobierno, pa por declara e dia di entiero como un dia di luto nacional, pa asina tur hende por dispidi di e principe, ya cu ta spera un cantidad hopi grandi di hende cu lo kier dispidi di e principe di Aruba.

E noticia cu hopi tabata teme, a yega diaranson merdia, ora cu a bira conoci cu e conocido musico arubano Hildward Croes a perde su bataya contra cancer. Esaki a keda confirma pa famia di Hildward Croes na NoticiaCla.com. For di siman pasa tabatin informacion cu Hildward su situacion a empeora y cu a pone cu famianan di dje mas serca a cuminsa yega Bogota pa ta presente cune. Oracionan rigoroso a cuminsa pa toch purba wak si esey ta yuda. Pero diaranson merdia e noticia lamentable a yega cu Hildward a bay sosega.

For di momento cu e noticia di morto di e musico Hildward Croes a plama diaranson merdia, media social y internet en general a keda inunda cu mensahenan di condolencia pa e homber cu a haya e apodo di ‘e principe di Aruba’. For di e famia mas serca, te na e persona mas lew, tabata hopi notable cu e morto a dal tur hende duro y e mensahenan tabata refleha esey. Mes momento notanan di condolencia di tur parti di mundo, di tur skina a cuminsa drenta y a usa Facebook mayor vez pa publica esaki. Algun emisora a cambia nan programacion. Canal 90 a dedica su atardi na ricibi mensahe na nomber di Hildward. E emisora Magic FM, a bay den un programacion di luto. Su directora, Erin Croes, ta primo di Hildward. 

Ministernan Arthur Dowers y Otmar Oduber rapidamente a mustra nan sentido pesame riba nan pagina. “Awemerdia a drenta e tristo noticia cu e gran musico arubiano Hildward Croes a bai sosega. Un musico cu a representa Aruba den bandanan grandi den exterior. Palabra di condolencia y cu Hildward sosega na pas” e mandatario di husticia a pone. Pa loke ta minister Oduber, e tabata den un situacion poco incomodo, mirando cu e tabata den pleno celebracion di e di 1 miyon bishitante pa Aruba. no obstante esey, e la pone su mensahe di pesame apropia tambe. “Memei e alegria di ricibi nos bishitante 1 miyon, e noticia hopi tristo a drenta cu Hildward a fayece. E ta un sentimento mixto, un di nos musiconan di mas grandi a bay laga nos mientras cu na su isla stima e ritmo di brassband tabata rezona. Hopi forza na henter famia y amigonan, sigur nos lo sinti su falta. Cu Hildward sosega na paz.” Oduber a bisa. Un otro (parti di) mensahe tabata di su primo Addonsito “Ojala Creador a tuma ami y no ABO! ABO a sinjami SMILE cu tur hende;!”

For di Corsou a bin un dedicacion di parti di e asociacion di musica di Corsou, esta AMAK. (Lesa e dedicacion aki). Bek na Aruba, e conocido website www.arubaariba.com a dedica un serie di potret na su honor, y cu e palabranan ” Hermano danki pa e legacia cu bo a laga atras, mision cumpli y sosega na pas!”

Ta notable e impacto cu e bida di Hildward a haci, awor cu e no tey mas, cu hopi hende ta saliendo afo y mandando mensahenan tras di otro. Algun no tabata ni conoce personalmente, pero a actua como si fuera e tabata un conoci. Simplemente pa e loke cu Hildward a sa di haci pa Aruba.