Avion di TUI a trece 10 Arubiano pega na Surnam, bek pa Aruba

ORANJESTAD – Tin indicacion, segun noticiacla.com, cu gobierno a cambia di postura pa loke ta frontera habri y cera manera cu a anuncia algun tempo atras. Ora cu a anuncia cu ‘awor si’ frontera ta cera pa ‘tur’ hende, hasta Arubianonan cu ta pega den exterior, parce cu esaki a cambia. Un grupo di 10 pasahero di Aruba riba e buelo charter di TUI a baha diadomingo anochi na Aruba, for di Surnam unda cu nan tabata pega hunto cu un grupo di pasahero di Hulanda. E avion su destinacion final tabata Hulanda, pero a para na Aruba pa baha e 10 pasaheronan local y recohe un grupo di pasahero Hulandes. 

CUARENTENA OBLIGATORIO

Prome minister Evelyn Wever a confirma dialuna mainta na noticiacla.com cu e 10 pasaheronan aki a bay den cuarantena obligatorio asina cu nan a yega Aruba. Pero mas interesante ta e hecho cu e mandatario ta sigura cu semper e frontera lo tabata habri pa busca hende, y si localnan yega, nan por drenta. 

PROBLEMA TECHNICO

E avion di TUI tabata poni pa yega Aruba for di diabierna pero a haya problema technico. Como tal TUI a manda un otro avion pa busca e pasaheronan pega. A ubica e pasaheronan diabierna den dos hospital y a keda den caurentena eynan pasobra nan tabata den contacto cu pasaheronan di pais bisiña Guyana. 

FRONTERA CERA

A puntra Wever con bin avionan ta baha toch na Aruba siendo cu a bisa algun siman pasa cu ‘awor si’ ta cera frontera pa tur hende y cu carga so ta baha. Wever tabatin un splicacion pa e portal aki: “Aruba ta sera pa tur inbound passengers, cu excepcion di casonan cu Minister por duna aprobacion” Wever a cuminsa splica. “Manera mi a splica den conferencia di prensa siman pasa, avionnan lo sigi baha pa trese carga of busca turistanan cu ainda ta pega aki y si ta posibel poco poco nos ta trese nos hendenan cu ta pega den exterior, bek”. Djey e la referi specificamente na e grupo di diadomingo. “ Esey tabata e caso ayera tambe den cual un grupo di 10 persona a yega cu tabata pega na Surinam. Tur esfuerso pa trese nan prome, no a duna resultado, te ayera. Nan a bai den cuarentena estricto y ta wordo vigila di serca” Wever a sigura e portal aki. 

CLARIFICACION

Como clarificacion riba e ‘ciere di frontera, Wever a purba splica esaki :” Asina - apesar cu frontera ta cera - nos lo purba yuda nos residentenan cu ainda ta pega den exterior. Na fin di dia, e ta keda nos responsabilidad pa trece nan bek. Lo no ta posibel pa trece tur, pero si nos tin oportunidad pa trece nan y e no ta un riesgo pa salud publico, nos lo trece nan”. Esaki ta un cambio segun e portal aki, ya cu e mandatario a bisa den un conferencia anterior cu esaki lo no sosode. Ora cu a puntra e mandatario riba esaki, e mandatario a diferencia di opinion cu e portal aki.”Si. Ma bisa esey”, e mandatario a sigura e portal aki. Pues, e mandatario ta bisa cu aunke cu frontera ta cera. Potret ta cortesia di e portal 'De Waterkant'.