Gobierno Mericano a ordena aeroliñanan reembolsa pasaheronan pa buelo cancela

WASTHINGTON – Oficialnan federal Mericano diabierna a ordena e aeroliñanan Mericano pa reembolsa clientenan pa buelonan cancela, bisando cu tin un grupo grandi di pasaheronan tabata critica referente e pandemia di coronavirus cu e aeroliñanan tabata provee credito pa otro buelo envez di placa cash. E departamento Mericano di Transporte no a bisa cuanto claim a keda substancia, pero el a manda un notificacion enforsa pa e aeroliñanan bisando cu ‘pasaheronan mester wordo reembolsa mesora ora cu nan buelo ta cancela of coriendo retraso considerable”. Gobierno Mericano a bisa tambe cu e lo ehecuta discrecion prosecutorial y permiti aeroliñanan pa contacta cliente, actualisa nan politica y entrenta nan personal miho pa por atende cu e asunto. 

E departamento ta hayando un aumento di keho y pregunta di pasaheronan cu tabatin pasashi, incluyendo hopi cu pasashi ‘no reemborsable’, cu ta describe cu a nenga nan placa bek. E regla no ta aplica pa clientenan cu a dicidi riba nan mes pa no biaha debi na preocupacion di coronavirus. Aeroliñanan a cancela porcionan significante di nan schedule, mientras cu demanda a ‘desploma’. Pa februari, clientenan tabata cancela mas buelo cu nan tabata boek, segun e grupo industrial Airlines for America. Aeroliñanan ta bulando mitar di nan rutanan y solamente 1 di cada 10 stul ta yen.