Solucion na horizonte pa evita caida gabinete Rutte 2

DEN HAAG – Un acuerdo entre e partidonan di coalicion di gobernacion VVD y PvdA ta ‘na bista’. Asina fuentenan rond di e coalicion a raporta diahuebs anochi. Partidonan ta formulando un carta cu mester ta e posibel solucion. Unabes cu e carta aki ta cla, ta discuti esaki na mesa y ta tuma e decision final. “Cos ta bayendo den bon caminda” e fuentenan a sigui bisa. Cu esaki ta pone cu un eventual caida di gabinete Rutte 2 ta parse for di mesa y un posibel fin na e crisis di e ultimo dianan. Negoshacionnan intenso entre e dos partidonan a conduci na un posibel solucion cu ta evita cu cos por a rementa mahos net prome cu pasco.

Tabata for di diamars ultimo cu gabinete Rutte 2 tabata trahando duro pa resolve e crisis chikito cu a surgi ora cu 3 miembro di partido PvdA a vota contra un proposicion di nan propio minister. Mientras cu den Binnenhof ta papiando caba di caida di e gabinete, e protagonistanan mes ta trahando duro pa resolve e crisis aki lihe. Minister presidente Rutte no kier papia, y ta duna tempo pa resolve e asunto. E minister di cual su plan di maneho di salud a keda desbarata diamars, Edith Schippers (PvdA) a bisa cu e ta kere cu tin un solucion. No ta berdad cu e la pone ultimatum sino e lo retira, segun Schippers. “Esey no ta mi style” e mandatario a bisa. Pa diahuebs mainta tabata spera un carta y un solucion di e crisis aki, sino por conta cu un posibel caida di gabinete.