Maduro: Aruba no tin buffer pa un plan manera Hulanda pa supera coronavirus

Maduro: Aruba no tin buffer pa un plan manera Hulanda pa supera coronavirus

Posted on 04/3/2020 10:48 am AST | Updated on 04/3/2020 11:37 am AST

ORANJESTAD – Paisnan rond mundo manera Hulanda, Alemania, Francia y hasta islanan BES, Corsou y St Maarten ta usando of lo usa un plan economico di recuperacion unda cu ta scohe pa subsidia e negoshinan cu fondo pa nan sigui paga salario (limita) di e trahadonan. Aruba, sinembargo a opta diferente unda cu a opta pa paga e salario limita directo na e trahado. Por lo menos un gremio comercial ta pro pa e ‘version’ internacional manera Hulanda y otro paisnan menciona a opta pe. E minister di Finanza encarga, Xiomara Maduro, sinembargo a mustra pakico nan no por usa e ‘plan’ ey.  

NO TIN BUFFER

Minister Maduro a splica noticiacla.com pakico no a scohe pa e plan manera Hulanda. “Gobierno awor aki no tin buffer financiero pa duna e tipo di yudansa aki” Maduro a cuminsa na bisa. “Hulanda y BES (eilanden) cu ta parti di Hulanda tin e fondonan aki y no tin problema cu credibilidad financiero, manera ta e caso di Aruba pa por yega na e fondonan necesario dado caso nan no tin e placa”.

PLAN INTERNACIONAL

E plan cu Maduro ta referi na dje ta cu e paisnan menciona Hulanda  a opta  pa, esta e Noodmaatregel Overbrugging Werkgelegenheid, osea e plan ‘NOW’ ta nifica cu gobierno ta sostene e dunado di trabou financieramente cu un subsidio, unda cu   lo percura pa e trahado afecta, sigui haya p.e. 90% di su salario (na Hulanda y otro paisnan grandi), y pa e trahadonan di Caribe Hulandes,  BES Eilanden, nan lo sigui haya 80% di e salario. Segun algun comerciante, Aruba por haci mescos, y e por varia entre 60 pa 70% di e salario. E condicion ta cu e trahadonan no por wordo retira. Ademas e comerciante(nan) mester por demonstra cu nan a sufri por lo menos 20% di nan entrada. Tin un formula con e negoshinan por calcula esaki. Y unabez cu nan cumpli cu esaki, nan ta cualifica pa haya e subsidio. Tur esaki ta regla segun un documento cu noticiacla.com tin den su poder. E bon di e plan aki, manera cu e ta splica, ta cu e ta pone cu e trahadonan ta keda haya placa, por paga nan cuentanan manera AZV, WEB, Elmar y combustibles (cuminda), cu ta yuda e companianan vital di keda na bida, y asina ta percura pa economia keda draai.    

PLAN DI GOBIERNO NO TA TRAHA

Por lo menos un comerciante local ta ‘pro’ e plan manera proponi pa gobierno di Hulanda, y e ta splica noticiacla.com cu e ta considera e decision di gobierno  di Aruba con nan ta duna e suma di placa  na e trahadonan algo no corecto pa aplica awor. “Si paisnan grandi manera Hulanda, Francia, Alemania, Merca, islanan BES y hasta Corsou ta usa e modelo aki, pakico Aruba no por?” Rene Kan ta bisa. E ta un di e comerciantenan cu ta kere cu gobierno mester financia e salario via e dunado di trabou, via SVB , pa e trahado, pa asina nan no perde nan trabou. Segun Kan, e dunador di trabou por pone mas tambe si nan pone e  950, pasobra ningun hende por biba cu 950 florin so.  “Pakico nos na Aruba kier re-inventa e wiel? Claro cu ta bay ta imposibel pa convence Hulanda pa bin cu un otro plan” Kan a sigui bisa. Segun e comerciante, e plan di gobierno (paga e trahado 950 florin cu condicion cu e doño di trabou no ta paga nada sino e trahado no ta haya e 950) no ta suficiente si bo doño di trabou no ta paga e trahado nada. “Ki tipo di incentivo esaki ta?” Kan ta puntra. Cu e plan di Hulanda, trahadonan ta wordo paga un suma mas grandi, nan na nan turno por sigui paga nan gastonan, companianan ta haya entrada y economia ta sigui drai. Unabez cu e crisis pasa, tin compania sikiera na bida, cu ta laga economia sigui drai. 

GREMIO COMERCIAL

E gremio comercial ATIA tambe ta pensa den e direccion ey. Su director Michelle de Groot na Noticiacla: “Si, ta berdad. Nos ta pensa cu yudando e werkgevers bo ta yuda e trahadornan tambe” de Groot a cuminsa na bisa e portal aki. “Nos ta pensa cu mester focus riba companianan sobrevivi e crisis aki. Ta e unico manera pa sigura cuponan di trabou  pa e trahadornan y pa laga nos economia recupera y cuminsa funciona lo mas pronto posibel” e director a sigui bisa. De Groot a confirma cu diabierna nan (hunto cu otro gremionan) ta topa cu gobierno pa sigui papia. “Nos ta proponiendo varios medida cu no ta costa gobierno fluho di placa (cash outflow) pero si un entrada mas abou den futuro. Nan ta inclui flexibilidad di labor y varios alivio den area di impuesto pa asina companianan por tin cashflow na e momento aki. Esaki lo percura cu companianan por sigi mantene mas trahador na un salario (porta reduci) y cu por sobrevivi pa e lunanan cu no ta bai tin entrada” De Groot a finalisa bisando. 

AYUDO DI HULANDA

Manera ta conoci, Aruba a pidi Hulanda pa ayudo financiero, y Hulanda ta evaluando e scenarionan. E portal aki a compronde cu un plan manera cu Aruba tin aworaki, por conta cu resistencia di Hulanda debi na su ‘forma populista’ pa cu e clase trahado. Pues cu esaki e chens pa Hulanda yuda, Aruba, por ta mas chikito. Lider di fraccion di MEP, Rocco Tjon a confirma e pensamento aki den un comunicado diahuebs atardi. Segun Tjon, “e unico “ayudo” cu Hulanda a duna te cu aworaki ta pa duna permiso pa Aruba por subi mercado internacional pa fia placa, esaki pa nos por cumpli cu nos debernan coriente. Esaki ta un ayudo superficial pasobra e no ta costa Hulanda nada. Pa loke ta e recursonan necesario (1.3 biyon florin) cu a wordo presupuesta pa brinda alivio na e 25 mil famianan y 5 mil empresanan te dia 15 di april Hulanda ta tuma un decision riba esaki. Informacion cu a yega cerca nos ta si cu Hulanda no lo duna, ni para garantia pa un fiansa contra interes faborabel” Tjon a finalisa bisando den un articulo cu el a publica diahuebs atardi. Mientrastanto, riba esaki, Kan ta comenta tambe. Segun e comerciante, e ta bisa di ta sigur cu mirando e situacion cu mundo ta aden aworaki, Aruba lo no por presta riba mercado local di bono (hende lo prefer sinta riba nan placa cash) of e mercado internacional sin e ayudo di Hulanda. Manera e dicho na ingles ta bisa ‘Beggars can’t be choosers’. “Nos ta den un crisis y mester resolve e asunto aki” Kan ta finalisa bisando. 

 

 

  • Por traha maximo 2 mil camber mas den proximo 5 añanan

    Por traha maximo 2 mil camber mas den proximo 5 añanan

    ORANJESTAD – Minister di Infrastructura Marisol Lopez Tromp a anuncia diamars mainta cu gobierno lo bay limita e cantidad di camber extra di hotel na 2000 den e proximo 5 añanan. Asina cu e ley ta cla, lo implementa e regla aki. Esaki no ta conta pa e construccion na p.e. San Nicolas si, segun director di Directie Infrastructuur en Planning (DIP) Haime Croes. E decision anuncia ta a pase di reunionan, discussion y diferente rapport cu ta existi, y teniendo cuenta cu e ROP y condicion pa por construi awendia. Croes a splica cu den e ultimo 10 aña a construi 3.500 camber cu a crea un mobilisacion di 20 mil hende extra den un solo tiro. Algo cu no por mas. Pesey a dicidi cu ta tuma e medida aki, conforme e consehonan ricibi. A mustra cu den pasado tabata construi pa loco, y cu esaki tabatin su consecuencia. 

  • No tin fecha definitivo ainda pa reapertura di frontera

    No tin fecha definitivo ainda pa reapertura di frontera

    ORANJESTAD – Ainda gobierno no ta cla pa anuncia reapertura di frontera di Aruba. Asina prome minister Evelyn Wever Croes a anuncia dialuna anochi den e briefing pa COVID-19. Mientras cu a bisa cu kier haci esaki entre 15 di juni pa 1 di juli proximo, ainda tin reunionan tumando lugar pa ‘streamline’ esaki bon. “Nos no tin e fecha definitivo ainda pero nos ta preparando si” Wever a bisa. Kier yega na habri e frontera pa e fechanan menciona. E motibo cu a anuncia e fecha cu hopi anticipacion, ta pasobra ta hopi hende ta traha den e sector aki y mester a cuminsa prepara. For di siman pasa tabatin indicacion cu lo a haci e anuncio, pero esaki ainda no ta cla pa tuma lugar segun Wever. 

  • POR evaluando fecha nobo pa congreso pa eligi lider nobo

    POR evaluando fecha nobo pa congreso pa eligi lider nobo

    ORANJESTAD – Rumornan cu Otmar Oduber lo ta retirando awe dialuna como lider di partido POR, no ta completamente corecto. Asina e ainda lider di e partido a bisa noticiacla.com den fin di siman. E realidad ta si cu partido politico POR lo por tin un lider nobo pronto. E actual lider a confirma pa noticiacla.com cu enberdad lo mester a tuma lugar un congreso di partido unda cu mester a escohe un lider nobo. E congreso aki lo mester a tuma lugar di mei. Pero mirando e situacion di crisis di COVID-19, esaki no a sigui. “Riba conseho di partido mester dicidi kon ta sigi dilanti” Oduber a bisa. “Ami semper lo tey pa sostene y guia partido, te caminda ta necesario y deseable”.

  • Ex minister ta considera denuncia contra dje di como 'cantidad di nonsense'

    Ex minister ta considera denuncia contra dje di como 'cantidad di nonsense'

    ORANJESTAD – Ex minister Otmar Oduber a bisa noticiacla.com dialuna mainta cu e denuncia di Fundacion Nos Ta Aruba contra dje, ta un ‘cantidad di nonsense nan’. Ademas Oduber a bisa inicialmente cu e no ta na altura di e denuncia. Ora cu a confronta Oduber cu e cargonan, el a bisa cu e casonan menciona ‘no ta berdad’ y cu nan no ta cuadra. Oduber a retira aña pasa di politica. Segun Oduber, ta un campaña di difamacion tin contra dje. 

  • Awe taxista y chauffeurnan di autobus por busca nan plachi na DIMP

    Awe taxista y chauffeurnan di autobus por busca nan plachi na DIMP

    ORANJESTAD – Entrante awe dialuna awor, dia 1 di juni, Departamento di Impuesto lo cuminsa otorga e plachinan di number TX y B di an?a 2020. Tur taxista y chauffeur di autobus por acudi na balie 6 na e oficina principal na Camacuri. Pa e servicio aki Departamento di Impuesto ta mantene e siguiente schedule.

  • Wever: Prematuro pa specula riba un di dos lockdown caba

    Wever: Prematuro pa specula riba un di dos lockdown caba

    ORANJESTAD – Gobierno no ta descarta un di dos lockdown, aunke ta prematuro pa specula riba esaki awor. Asina prome minister Evelyn Wever Croes a bisa relaciona cu e preocupacion di AHATA riba un di dos lockdown relaciona cu e crisis di coronavirus COVID-19. Ademas Wever ta sigura cu no ta bay usa fondonan genera pa cubri e posibel pago di seguro di biahe di turista, pa cubri deficit di AZV. Esaki tambe tabata un preocupacion di AHATA. 

  • aruba airlines
  • Powered by SETAR