- Cantidad di hende condecora na Corsou ta hopi menos cu Aruba e aña aki
- Presentacion ‘Bulletproof Sleep’ riba Syndroom di Apneu, na Biblioteca Nacional Aruba
- Aruba ta co-anfitrion di Torneo futbol Damas U15 Concacaf cu Trinidad y Costa Rica
- Doño di cacho abusa ‘Khaleesi’ ta dilanti huez fin di mei
- Un total di 18 ciudadano di Aruba ta haya Condecoracion Real
Reunion di RMR no a produci palabracionan concreto awe
DEN HAAG – E reunion awe mainta di Conseho di Minister di Reino (RMR) no a produci palabracionan concreto pa e islanan di Reino Hulandes incluyendo Aruba. Asina por compronde di e reaccion di minister plenipotenciario pa Aruba na Hulanda, Guilfred Besaril. Un di e temanan lo mester tabata kico RMR ta dicidi financieramente, pero esaki no a tuma lugar. Por a compronde di lider di fraccion di MEP Rocco Tjon diahuebs, cu esaki lo bin te pa dia 15 di april.
TEMANAN TRATA
Un di e temanan cu a keda trata ta esun cu ta toca salubridad publico. Segun e mandatario e situacion ta diferente pa cada isla y cu por ehempel na St. Maarten e nesesidad ta hopi mas grandi cu e otro islanan, pasobra St. Maarten ainda ta recuperando di e golpi basta grandi cu e isla a haya di dos orcan tres aña pasa.
AYUDO MILITAR
Tambe den e reunion di RMR a papia riba ayudo militar y con esaki lo por bira efectivo na momento cu esaki bira necesario. ‘Papiando di actividad militar na nomber di pais Aruba mi a trece padilanti na minister di Defensa sra. Ank Bijleveld e paso tuma pa Merca pa pone movecion militar den Caribe y kico esaki ta trece cune pa cu Caribe. Minister Bijleveld a keda di comunica cu e embahador di Merca na Hulanda pa asina nos tin un mihor bista kico e accion militar aki diparti di Merca ta nifica pa e resto di e region Caribense,’ asina minister Besaril a bisa.
LIMITACION NATURAL
Sr. Besaril a sigi bisa cu pa loke ta e region Caribense, Nacionnan Uni dos dia pasa a trece dilanti nan preocupacion pa loke ta e limitacionnan natural di e region cu tin un frontera di awa y cu nan ta mira tambe riba e poco recursonan di e islanan. Na final minister Besaril a bisa cu a toca e tema cu ta esun importante pa loke ta pais Aruba. Minister Besaril: ‘No menos y mas importante cu e otro problemanan cu a keda trata, pero tambe un preocupacion enorme pa nos isla cual ta e aspecto financiero. “Riba esaki nos a palabra cu otro cu nos lo sigi e dianan aki den combersacion estrecho entre e diferente ministerionan di Finanzas pa asina aki otro siman nos cuminsa yega na decisionnan concreto kico ta bai ta e ayudo; con e ayudo aki ta bai tuma lugar y ki tur e ayudo financiero ta bai encera,” segun minister Besaril.
Gobierno Hulandes ta evaluando pa stop su paginanan riba Facebook
DEN HAAG – Tin chens cu gobierno di Hulanda por stop su actividad riba e red social Facebook. Esaki pasobra e compania madre di e compania, esta META, no ta dispuesto pa adapta cierto risico pa loke ta informacion personal di persona. Asina secretario di estado Hulandes Alexandra van Huffelen cu tin e cartera di digitalisacion tambe. Un conseho di ‘Autoriteit Persoonsgegevens’ a confirma den un conseho na e ministerio di Binnenlandse Zaken en Koninkrijkrelaties (BZK) di e risiconan en cuestion y a conseha pa no continua cu nan actividad riba Facebook.
Seleccion di futbol Hulandes PSV tin posibilidad pa titula campeon di Hulanda awe nochi
EINDHOVEN – E seleccion di futbol Hulandes PSV tin posibilidad pa titula campeon di Hulanda awe nochi. Awe nochi (ora di Hulanda) tin e partido entre PSV y Sc Heerenveen. Si nan gana, y Feyenoord no logra haya punto contra Go Ahead Eagles, e seleccion di Peter Bosz no por wordo alcansa mas. Hasta si PSV empata contra Heerenveen y Feyenoord perde di Go Ahead, e titulo ta di e ekipo di Eindhoven. Pa PSV, esaki lo ta e prome titulo nacional desde 2018.
Arubahuis a tene un ‘Ban Topa’ cu studiantenan na Den Haag
DEN HAAG – Arubahuis a tene un Ban Topa diaranzon anochi 24 di April cu studiantenan for di e region di Leiden, Den Haag, Delft y Rotterdam. Esaki a tuma lugar na De Haagse Hogeschool y a conta cu presencia di Minister Plenipotenciario mr. Ady Thijsen, Minister di Finanza y Cultura Xiomara Maduro, Minister di Labor, Integracion y Energia Glenbert Croes y directora di Gabinete di Aruba mr. Joselin Croes. Tambe tabata presente directora di Departamento di Recurso Humano (DRH) Omaira Lares.
Na Hulanda, partidonan formando formando gobierno, kier corta ‘eigen risico’ den cuido medico
DEN HAAG – E partidonan politico cu ta formando gobierno nobo na Hulanda ta deliberando pa haci cambionan drastico den cuido medico, particularmente e suma cu e ciudadano tin cu paga su mes, conoci como ‘eigen risico’, pa e haya e cuido. Nan ta sinti cu e suma actual, 358 euro, ta mucho halto. Y ta pensando pa sea baha esaki na mitar of elimina esaki completamente. E ta un deseo ferviente di e partidonan PVV y BBB. Nan ta kere cu e suma halto di eigen risico ta pone cu hopi ta evita pa haya ayudo medico. E otro dos partidonan VVD y NSC ta mas cauteloso, pasobra si elimina e suma, ta kita e concientisacion cu cuido no ta gratis. E intencion ta pa elimina abuso den cuido medico y ta pone hende pensa dos biaha prome nan bay pa e cuido cu porta ta innecesario. Si elimina e suma, e ta costa e pais 3.6 biyon euro pa aña.
Preocupa cu e nivel di gobernacion, Hulanda ta ofrece Aruba y Corsou curso pa por goberna miho
ORANJESTAD/WILLEMSTAD – Pa fortifica e poder di gobernacion riba e islanan di Reino Hulandes den Caribe, Universidad di Utrecht y de Haagse Hogeschool ta cbay ofrece un estudio parcial di ‘bestuurskunde’ hunto cu universidadnan di Aruba y Corsou. Asina e portal utoday di Hulanda ta raporta. E gabinete ta preocupa cu e gobierno di Corsou, segun secretario di estado Hulandes Van Huffelen. E ta plan tambe cu e minister Hulandes di Enseñansa Dijkgraaf a trata recientemente durante su bishita na Aruba y Corsou.
Rey Willem-Alexander no ta wak e serie Maxima pa no irita su mes riba e partinan incorecto cu por tin
AMSTERDAM – Rey Willem-Alexander no tin planea pa wak e serie riba su casa, Maxima. Asina e la declara e siman aki, na e portal Shownieuws. E no kier irita su mes riba e partinan ‘incorecto’ di e serie. “Mi a tende cu e ta un serie bunita, bon hinca den otro, pero mi ta bay irita mi mes na e cosnan cu ta incorecto (den e serie)” e Rey a bisa. E serie, titula Maxima, ta riba television Hulandes, desde diasabra. Maxima ta trata e bida di e Reina, te cu su compromise cu Willem-Alexander. Den e serie tin tambe un escena intimo cu e dosnan. E serie a kibra hopi record di television. Maxima mes a laga sa cu ainda e no tabatin tempo pa wak e serie dramatico.
Follow NoticiaCla
