Ayudo di Reino no ta un regalo sino un fiansa pa paga bek

ORANJESTAD – Gobierno di Aruba a confirma diahuebs anochi cu e ayudo di Reino cu a wordo pidi, lo no ta un regalo sino un fiansa cu mester paga bek. Esaki no obstante e hecho cu a pidi parti como un regalo. Diahuebs merdia Minister President Evelyn Wever Croes y Minister di Finansa Xiomara Maduro a reuni cu Minister Knops y e Minister Presidentnan di Corsow y Sint Maarten den un reunion preparatorio pa e reunion diabierna di Conseho di Minister di Reino. Dentro di poco Conseho di Minister di Reino lo trata e peticion pa yudansa di cada Pais y lo mester tuma un decision. Segun gobierno di Aruba, e ta bisto cu e yudansa no ta bay ta un regalo, ma e ta bay ta den forma di un fiansa cu cada Pais mester paga bek. Cuanto placa lo por haya pa fia lo depende di e capacidad di cada Pais pa por paga bek.