ATIA: Sector publico tambe mester entrega

ORANJESTAD – E gremio commercial ATIA a tuma nota di un carta cu sindicatonan a manda pa gobierno relata na cierto expresionan cu Minister President a hasi, caminda ta duna di conoce cu tur Parlamentario, Ministernan y empleadonan publico lo mester bay entrega. Den e carta aki, e sindicatonan ta duna di conoce den nan palabranan:” na cualkier momento cu gobierno kier mishi cu e posicion huridico di empleadonan publico, esaki mester ta a base di acuerdo cu sindicatonan!”. E tono ta duna di conoce caba cu lo no ta un lucha fasil segun ATIA su comunicado.

E gremio ta sigui mustra cu ta di lamenta cu companianan ta serando nan porta, sea temporalmente of definitivamente, empleadonan ta perdiendo trabouw of entrada y ainda sindicatonan di sector publico tin e pensamento cu e trahadornan di sector publico por keda sin sacrifica parti di nan entrada pa yuda nan pais sobrepasa e crisis aki na un manera solidario.

Ademas ta lubida, cu sector priva ta e fuente di entrada pa caha di gobierno cual ta paga entre otro salarionan di personal di sector publico. Awor cu sector priva ta sufriendo un di e golpinan mas grandi den storia, ta rechasa di extende un man pa yuda sector priva sobrevivi. Na momento cu e crisis pasa, sector priva ta esun cu lo mester purba recupera lo mas pronto posibel pa por pone nos economia funciona di nobo y cuminsa trese fondonan na e caha di gobierno atrobe.

ATIA ta hasiendo su maximo esfuerzo pa convence gobierno pa bin cu medidanan cu lo realmente yuda sector priva sobrevivi y recupera den un siguiente fase. Ta noble di parti gobierno pa kier yuda esnan cu a perde trabouw, pero door di yuda companianan por medio di entre otro subsidio di salarionan y alivio den area di impuestonan cu ta yuda e cashflow di companianan, companianan lo por mantene nan trahadornan y prepara un plan di recuperacion pa na momento cu por, nan cuminsa opera bek. Ademas, cu un subsidio di salario, manera tur otro parti di reino a propone, lo por percura pa un suma mas grandi cu e 950 florin den saco di e trahadornan y un relacion continuo cu nan dunador di trabouw.

Segun e gremio, aworaki no ta e momento pa wak beneficio personal si no pa mustra curason pa nos pais y cuminsa wak con nos tur hunto por yuda nos pais sobrevivi y bai dilanti lo mas pronto posibel. ATIA ta urgi gobierno pa hasi lo corecto y cuminsa tuma pasonan pa corta gasto y alabes ta spera cu sindicatonan por refleciona pa aporta na un manera civico como parti di nan deber como sindicato.