Plasterk: Aruba constantemente ta ignora palabracionnan haci cu Hulanda

DEN HAAG – E presupuesto di Aruba tur aña tabata mucho optimista. Trahamento di un ‘suppletoire begroting’ cada bes despues ta confirma esaki. Tur aña tin deficit grandi, cu un debe nacional creciente. Aruba no a cumpli cu palabracionnan haci na maart di 2013, Y asina minister hulandes Ronald Plasterk a insisti stipula punto pa punto unda cu a duna Aruba hopi chens pero cu Aruba simplemente no tabata cumpli cu su palabracionnan, y of no tabata haci e ahuste nan necesario. Consecuencia a conduci den un aanwijzing siman pasa diabierna. Asina e ta contesta parlamentarionan den un carta riba e situacion di crisis na Aruba diamars mainta. Particularmente riba e pregunta, si Hulanda a haci suficiente pa evita cu mester a yega asina lew, y cu si e accion di premier Eman tin efecto negativo pa e imagen di Reino. Aki Plasterk a repasa kico tur a wordo haci pa evita pa Aruba yega na e punto aki.

Segun Plasterk, a conseha Aruba constantemente pa laga un instancia independiente analisa e presupuesto 2014 prome cu e yega serca gobernador, ‘pero gobierno di Aruba no a haci esaki’. Dia 13 di maart 2013 Aruba a sera un protocol riba e posibilidad di Aruba pa fia placa (obligatieleningen) riba condicionnan manera cu Corsou y St Maarten a haya. E condicionnan stipula pa cumpli cu esaki, Aruba no a haci. Un bishita di nivel halto na maart di 2014 di Hulanda na Aruba pa papia riba e acuerdonan di Ministerraad a tuma lugar. Aki gobierno di Aruba mes lo a sugeri pa tin un control y clasificacion pa un tercera instancia. Na april 2014 durante bishita di minister Yrausquin na Hulanda a recorde riba esaki. Y riba 28 di mei 2014 a manda un carta atrobe pa Aruba cu ta mustra cu no a duna contenido na e palabracionnan haci.

Riba e asunto di CFT, Plasterk despues ta referi na e palabracionnan haci dia 3 di juli 2014, riba un investigacion independiente di CFT. Plasterk e ora ta referi na punto number 3 di e acuerdo. “Pa prome minister di Aruba, prome minister di Hulanda y ami tabata evidente cu nos tabata papia di secretariado di CFT”. Segun Plasterk esey ta logico pasobra CFT ta e unico organo dentro di Reino cu tin un tarea asina stipula. Cu e palabracion aki, e aanwijzing tabata parce ‘pa pasado’.

Pero tabata siman pasa pa medio di dos carta y varios conferencia via telefon di premier Eman, unda cu e lo la informa Plasterk cu e no kier bay di acuerdo cu e palabracionnan haci. “Esey tabata e momento cu Conseho di Minister di Reino a dicidi diabierna 11 di juli 2014, cu e peticion na gobernador di Aruba”. Plasterk ta referi na e aanwijzing.