Debi na e sensibilidad di e test pa coronavirus, ta tarda pa 'clear' un pashent contagia

ORANJESTAD – E motibo cu ainda no a anuncia cu un of mas di e 54 personanan contagia cu e coronavirus ta liber di e virus, ta conoci. Diamars anochi durante e briefing riba e virus, hefe di Dienst Besmettelijke Ziektes (DBZ) Sharline Koolman a splica cu esaki ta debi na e tipo di test cu ta haci riba e personanan aki. 

PCR TEST

Ta trata di  e asina yama PCR testkit , cu ta uno hopi sensitivo. Sensitivo kier men cu si e persona contagia tin un tiki virus load (cantidad di virus den curpa di e persona contagia) mes, esaki ta keda exponi pa e test como positivo. Y tanten cu e test ta positivo, e persona contagia no ta haya e ‘label di ta ‘liber di e virus’. Esnan cu ta cay bou di e grupo aki, ta wordo ‘gelabeled’ como ‘zwak positief’, pasobra nan ta positivo, pero leve.