Gobierno ta ‘waive’ suma di 175 miyon dollar pa CITGO Aruba

ORANJESTAD – Mei mei di e crisis di coronavirus, Gobierno ta atendiendo e asunto di CITGO Aruba Refinery tambe. Den cuadro di esaki, Gobierno a entrega un peticion na Parlamento pa ‘waive’ e suma di 175 miyon dollar cu CITGO Aruba Refinery lo mester a paga, y a cambio por haya control di e refineria. Asina prome minister Evelyn Wever Croes a confirma den un programa di radio na Top FM diamars mainta. Ademas Wever a confirma cu a logra pa CITGO paga Aruba 16 miyon na impuesto, enves di e algo mas di 17 miyon cu nan lo tabata debe. Placa awor cu segun Wever, ta hopi ‘welcome’. 

WAVE 

Segun Wever, den contract cu gobierno anterior di Aruba a cera cu CITGO Aruba, tin dos clausula cu ta trata entre otro e desmantelacion (150 miyon) y tambe e parti di daño contra medio ambiente (25 miyon) cu conforme contracto, CITGO lo mester a paga gobierno di Aruba. Sinembargo, gobierno a opta pa ‘waive’ esaki y a cambio haya control definitivo pa e refineria, sino lo mester a bringa CITGO den corte pa hopi aña. 

MOTIVACION PA DECISION

Tabatin motibo tambe pa gobierno di Aruba yega na e decision aki pa wave,  cu ta entre otro cu gobierno no kier pa e refineria wordo desmantela. Ademas pa loke ta e daño di medio ambiente, gobierno ta rasona cu CITGO no a haya chens mes di opera drechi como refineria, di tal forma cu no a haci ‘hopi’ daño na medio ambiente. E daño causa pa otro refinerianan den pasado, no por core pa cuenta di CITGO tampoco. 

TRATAMENTO

E intencion ta pa trata e concepto di ley pa Parlamento aproba Gobierno pa finalisa e contracto definitivo dentro di poco. A compronde cu fraccionan di parlamento mester cuminsa haci pregunta pa despues gobierno contesta esaki. Segun Wever, partido AVP a indica cu nan tin varios pregunta, y a priminti cu lo contesta e preguntanan mesora pa asina agilisa tratamento di e ley aki. E ley mes a yega Parlamento siman pasa.