CITGO Aruba lo paga Aruba 16 miyon dollar na impuesto

ORANJESTAD – Gobierno a yega na acuerdo cu CITGO Aruba Refinery pa paga e suma di 16 miyon dollar, cu ta algo mas cu 28 miyon florin na impuesto atrasa. A calcula cu e suma ta algo mas cu 17 pa 18 miyon dollar, pero despues di hopi bay bin, a logra yega na e suma menciona. Asina premier Evelyn Wever Croes a declara den un programa di radio na Top FM diamars mainta.

NO TIN PLACA

Segun Wever, e situacion financiero di e refineria ta asina malo cu esey so gobierno por a logra. Ta prefera yega na algo cu nada, y e placa segun e prome mandatario ta placa cu nan no a conta ariba, pues e ta hopi bon bini mes den momentonan dificil cu Aruba ta pasando aden. Cu e suma aki tambe, e refineria ta keda liber di mas debe cu pais Aruba. Ademas (referi na otro articulo adhunto), gobierno a bay di acuerdo pa ‘wave’ CITGO Aruba Refinery di 175 miyon dollar di claim, cu Aruba por a haci pa desmantelacion y daño na medio ambiente. Aruba no kier pa e refineria wordo desmantela y CITGO no a opera di tal forma cu no a haci ‘hopi’ daño na medio ambiente. E daño causa pa otro refinerianan den pasado, no por core pa cuenta di CITGO tampoco.