Dept di Salud tin 5000 PCR testkit pa test hende pa coronavirus

ORANJESTAD – Departamento di salud (DVG) di Aruba tin un total di 5000 PCR test kit na Aruba pa test persona pa coronavirus. Esaki ta e tipo di test cu Center for Disease Control na Merca tambe ta usa. Asina e hefe di departamento di malesa contagioso  Sharline Koolman a contesta pa noticiacla.com durante e briefing riba coronavirus dialuna. E pregunta ta debi cu Aruba a opta pa haci testnan agresivo, esta den cantidad grandi pa asina mira mas liher ken tin e virus y asina controla e situacion mas liher. Esaki ta contrario na Corsou unda cu a opta un maneho diferente. Actualmente na Aruba a haci como 700 test, pues nan tin suficiente test y si mester busca mas, lo haya esaki tambe.