Ministerio Publico lo actua strictamente durante crisis di corona

ORANJESTAD - Ministerio Publico lo actua strictamente durante crisis di corona. Asina vocero di ministerio publico Ann Angela ta raporta den un comunicado dialuna. Segun Angela, Aruba ta pasando den temponan duro actualmente. Gobierno di Aruba a tuma tur tipo di medida pa stroba e virus di COVID-19 di plama mas tanto posible y pa limita e consecuencianan di esaki.  Ta trata di medidanan pisa, manera Toque de Queda y Shelter in Place, cu ta hopi impactante riba bida di nos ciudadanonan, pero cu ta necesario pa proteccion di salud di tur hende.

CONTROL

Cuerpo Policial di Aruba ta controla e Toque de Queda y otro medidanan intensivamente. Multanan halto ta wordo duna na esnan cu kibra e medidanan y na mes momento Polis ta haci un yamada na ciudadanonan pa cumpli cu e medidanan. Ta di sumo importancia pa sigui tur ordo y yamada di Polis. 

TOLERANCIA

Segun ministerio publico, lo no tolera violacion di e reglanan y medidanan. Ministerio Publico lo mantene ley strictamente contra personanan cu no tene nan mes na reglanan of cu dificulta trabao di Polis. Lo actua duro contra esnan cu usa e crisis di COVID-19 pa viola ley y pa haci maluso di e situacion.

BRINGA HUNTO

E lucha contra COVID-19 lo por ta exitoso solamente si nos tur bringele hunto. Ministerio Publico ta haci un yamada grandi na un y tur pa coopera cu otro na interes di Pais Aruba y su cuidadanonan. Ta hunto so nos por proteha salud di nos ciudadanonan, segn Angela.