Polis a actua riba ‘samenscholingsverbod’ pero no a duna multa

ORANJESTAD – Polis a actua caba riba e regla nobo impone pa gobierno di ‘samenscholingsverbod’, pero no a parti multa ainda. Asina por nota di e relato di polis di fin di siman. Segun e relato aki, tabatin por lo menos dos ‘incidente’ di samenscholing’ (ta hunto den grupo di mas di 3 persona riba caminda publico). Uno tabata diadomingo atardi na altura di panaderia di Dakota. Aki polis a haya un gurpo di persona na un supermercado banda di e panaderia. Polis a simplemente hala nan atencion y a bisa nan pa aloha di e lugar. Mes momento tabatin un otro caso. E biaha aki na altura di un cas na Schotlandstraat unda cu polis a papia cu doño di e cas di inicial Q. A informe di e reglanan di samenscholing. Q a mustra comprension y a tuma paso. Aki tampoco polis ta haci mencion cu a multa e persona pa motibo di a viola e regla aki. E intencion ta cu ora cu un persona viola e regla aki, e haya multa di polis. E multa ta varia.