Cantidad di detenido durante toque de queda a baha te 16

ORANJESTAD – E cantidad di detencion relaciona cu e toque de queda pa e crisis di coronavirus, a baha te na 16 durante e di 9 anochi. Asina vocero di polis Lito Laclé a confirma dialuna mainta. A haci un siman diadomingo cu gobierno a implementa esaki debi na e crisis. For di e prome dia, un cantidad basta grandi di persona a keda deteni y e cifra diariamente a keda fluctua basta halto. Notable ta cu ningun dia esaki tabata 0, pero tabata subi y baha. Y tambe mayoria di e detencionan tabata sosode den e prome oranan cu e toque de queda drenta na vigor. De hecho, e prome detencionan tabata cay semper algun minuut despues di e toque de queda drenta na vigor tur anochi. E medida aki ta keda na su lugar por lo pronto, y ta papia di posibel extencion cu 2 siman. E prome anuncio tabata cu e medida tabata te dia 31 di maart 2020, pero mirando e comportacion di nos comunidad, y e aumento di caso positivo, a prolonga esaki. NOTA: E potret ta di un detencion di e prome anochi di toque de queda.